ភ្នំពេញ៖ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ នៅ ខណ្ឌឬស្សីកែវ ប្រជាពលរដ្ឋ សុំឲ្យអាជ្ញាធរ ជួយដោះស្រាយ រឿងក្មេងទំនើងប្រើប្រាស់គ្រឿងញៀន,សន្ដិសុខសណ្ដាប់ធ្នាប់សាធារណៈ,សុខាភិបាល , ផ្លូវ, ស្ដារលូ,ភ្លើងបំភ្លីសាធារណៈ ,សំរាមស្អុយ ,បញ្ហាចរាចរណ៍,បញ្ហាដីធ្លី ជាដើម ។ វេទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សារាជធានីភ្នំពេញ បានប្រព្រឹត្ដទៅថ្ងៃអង្គារ៏ ១៣រោច ខែអស្សុជ ឆ្នាំចសំរឹទ្ធិស័កព.ស២៥៦២ត្រូវនិងថ្ងៃទី០៦ វិច្ឆិកា ឆ្នាំ២០១៨ នៅមជ្ឈមណ្ឌលម៉ូឌែន៥ឬស្សីកែវ ក្រោមអធិបតីភាព លោក ម៉ប់ សារិន ប្រធាន ក្រុមប្រឹក្សារាជធានីភ្នំពេញ និងលោកស៊ុយ សេរិទ្ធ អភិបាលរងរាជធានីភ្នំពេញ ។
លោកម៉ប់ សារិន ប្រធានក្រុមប្រឹក្សារាជធានីភ្នំពេញ បានមានប្រសាសន៍ថា៖ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ ធ្វើឡើងរៀងរាល់មួយឆ្នាំម្តង តែនៅថ្នាក់សង្កាត់ និងខណ្ឌតែង តែធ្វើជាប្រចាំ ក្រោយពីបញ្ចប់វេទិកាពិគ្រោះយោលបល់ គឺយើងបូកសរុបបញ្ហា ដែលប្រជាពលរដ្ឋស្នើរឡើង និងការចង់បានរបស់ប្រជាពលរដ្ឋ ហើយដាក់ចូលក្នុងគម្រោងអភិវឌ្ឍន៍ ដើម្បីបំពេញការចង់ បាន របស់ប្រជាពលរដ្ឋ ។
លោកម៉ប់ សារិន ក៏បានស្នើរសុំឲ្យប្រជាពលរដ្ឋលើកឡើងនូវបញ្ហាប្រឈមនានា ក្នុងមូលដ្ឋាន ដើម្បីឲ្យអាជ្ញាធររាជធានីភ្នំពេញដោះស្រាយ ជូនបងប្អូន។ ក្នុងឱកាសនោះ លោកក៏បានកោតសរសើរ ចំពោះមន្ដ្រីថ្នាក់ខណ្ឌនិងកងកម្លាំងមានសមត្ថកិច្ចប៉ូលិសខណ្ឌដែលបានបង្ក្រាបបទល្មើសជាប្រចាំ ពិសេសលើការបង្ក្រាបគ្រឿងញៀន ការរៀបចំសណ្ដាប់ធ្នាប់សាធារណៈជូនបងប្អូនបានល្អកន្លងមក ។ នេះជាការបង្ហាញពីការចូករួមអនុវត្តគោលនយោបាយភូមិសង្កាត់ មានសុវត្ថភាពបានល្អ។
លោកបានបញ្ជាក់ថា៖ វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីនៅព្រឹកនេះ គឺផ្តោតសំខាន់ពាក់ព័ន្ធបញ្ហាសំខាន់ជាច្រើន ដែលទាក់ទងនឹងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ ,បញ្ហាបរិស្ថាន ,បញ្ហាគ្រឿងញៀញ,សុខភាព,ទឹក ,ភ្លើង,បញ្ហាដីធ្លី និងបញ្ហាអភិវឌ្ឍន៏មូលដ្ឋាន។
ក្នុងវេទិកានេះ ប្រជាពលរដ្ឋជាច្រើននាក់ បានឡើងមកស្នើរសុំដល់អាជ្ញាធររាជធានីភ្នំពេញ ជួញដោះស្រាយជាច្រើនករណី ដែលភាគច្រើនជាពាក់ព័ន្ធ នឹងការងារសាធារការ ដូចជា បញ្ហាអសមត្ថភាពវិស័យសុខាភិបាល, បញ្ហាគ្រឿង ញៀន,បញ្ហាក្មេងទំនើង,ផ្លូវ បញ្ហាដាក់លូ,ដីធ្លី,បញ្ហាការផ្ដល់បណ្ណ័កម្មសិទ្ធដីធ្លី និងផ្ទះ,បញ្ហាចរាចរណ៍និងបញ្ហាសំរាម ដើម្បីងាយស្រួលកាត់បន្ថយគ្រោះថ្នាក់ចរាចរ បញ្ហាកែឈ្មោះលើសៀវភៅគ្រួសារ ការចុះបញ្ជីឈ្មោះក្មេងតូចៗ ចូលក្នុងសៀវភៅគ្រួសារ នៅសាលាខណ្ឌមានការយឺតយ៉ាវ។
លោកស៊ុយ សេរិទ្ធ អភិបាលរងរាជធានីភ្នំពេញ បានបញ្ជាក់ថា៖ សម្រាប់រដ្ឋបាលរាជធានីភ្នំពេញការចូលរួម មតិយោបល់ និងលើកឡើងនូវសំណើរ សំណួរ សំណូមពររបស់ប្រជាពលរដ្ឋ ពិតបាននាំមកនូវសក្តានុពលយ៉ាងធំធេង និងបានធ្វើឲ្យរដ្ឋបាលរាជធានីភ្នំពេញ ឆ្លុះបញ្ចាំងនូវចំណុចអសកម្មនានា ពេលកន្លងមក ដើម្បីរដ្ឋបាលរាជធានីធ្វើការកែលម្អឡើងវិញ និងអភិវឌ្ឍន៍ក្នុងមូលដ្ឋាន ឲ្យបានល្អប្រសើរ និងស្វែងរកនូវដំណោះស្រាយ ជូនប្រជាពលរដ្ឋឲ្យមានតម្លាភាព និងមានប្រសិទ្ធភាព ក្នុងនាមជាតំណាងរដ្ឋបាលសាធារណៈ។
សូមបញ្ជាក់ថា៖ វាទិការផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីត្រូវបានធ្វើឡើងក្នុង១ឆ្នាំម្តងសម្រាប់មួយ ខណ្ឌៗ មានន័យថា ទាំង១២ខណ្ឌចំណុះអោយរដ្ឋបាលរាជធានីភ្នំពេញនិងធ្វើឡើងចំនួន១២ដង ស្របពេលដែលឆ្នាំ២០១៨នេះរដ្ឋបាលរាជធានីភ្នំពេញ បានបើកវេទិកានេះបានចំនួន៥ខណ្ឌរួចមកហើយនោះ ក្នុងនោះរួមមាន ខណ្ឌ៧មករា, ខណ្ឌទួល គោក ,ខណ្ឌមានជ័យ,ខណ្ឌចំការមន និងខណ្ឌឬស្សីកែវ សម្រាប់ព្រឹកថ្ងៃ០៦ វិច្ឆិកានេះ៕ ដោយ៖ សំរិត
