ភ្នំពេញ៖ ជនសង្ស័យម្នាក់បានធ្វើ សកម្មភាពលួចកង់ដែលទុកនៅមុខផ្ទះ គេកាលពី៣ថ្ងៃមុនក្នុងបុរីពិភពថ្មីត្រញំងថ្លឹង ត្រូវម្ចាស់គេស្គាល់មុខតាមរយៈ កាមេរ៉ាសុវត្ថិភាពក៏បានទៅប្រាប់សន្ដិសុខយាមបុរីឱ្យឃាត់ខ្លួនប្រគល់ឱ្យនគរ បាលប៉ស្ដិ៍ចោមចៅ កាលពីវេលាម៉ោង ៧យប់ថ្ងៃទី៣០ ខែវិច្ឆិកា ឆ្នាំ២០១៥ នៅក្នុងបុរីពិភពថ្មី ផ្សារត្រញំងថ្លឹង ភូមិត្រញំងថ្លឹង សង្កាត់ចោមចៅ ខណ្ឌ ពោធិ៍សែនជ័យ ។
ជនសង្ស័យខាងលើមានឈ្មោះ ម៉ែន វិរះ អាយុ១៩ឆ្នាំ ស្នាក់នៅផ្ទះជួល ភូមិ គោកបញ្ជាន់ សង្កាត់ចោមចៅ និងមាន ស្រុកកំណើតនៅភូមិសំបួរ សង្កាត់ដង្កោ ខណ្ឌដង្កោ។
ដោយឡែកជនរងគ្រោះជាម្ចាស់កង់មានឈ្មោះ បូ ផានី ភេទស្រីអាយុ ៤០ ឆ្នាំ មុខរបរលក់ដូរ បានប្រាប់ឱ្យដឹងថា កង់នោះជាកង់របស់កូនស្រីគាត់។
តាមការរៀបរាប់ពីជនរងគ្រោះបាន ឱ្យដឹងថា នៅកាលពីថ្ងៃទី២៧ ខែវិច្ឆិកា បានទុកកង់នៅមុខផ្ទះដោយនាំគ្នាចូល ទៅក្នុងផ្ទះអស់ខណៈចេញមកវិញក៏បាត់កង់ភ្លាមរូបគាត់បានទៅឆែកមើល កាមេរ៉ាសុវត្ថិភាពដែលបំពាក់នៅមុខ ផ្ទះឃើញជនសង្ស័យមកលួចយកកង់ របស់គាត់។ លុះដល់ថ្ងៃទី៣០ ខែវិច្ឆិកា វេលាម៉ោង៧យប់រូបគាត់បានឃើញជនសង្ស័យដើរនៅក្នុងបុរីម្ដងទៀតក៏ទៅ ប្រាប់ឱ្យសន្ដិសុខទៅឃាត់ខ្លួនតែម្ដង។
ជនសង្ស័យបានសារភាពនៅចំពោះមុខសមត្ថកិច្ចថានៅថ្ងៃទី២៧ វិច្ឆិកា វេលាម៉ោងជាង៤ល្ងាចរូបគេនិងបក្ខពួកម្នាក់ទៀតបានជិះកង់ចូលក្នុងបុរីរហូត ទៅដល់ផ្ទះលេខA9 លក់អីវ៉ាន់ចាប់ហ៊ួយ ក៏មានកង់របស់កូនម្ចាស់ផ្ទះដាក់នៅខាងមុខផ្ទះដោយឃើញឱកាសល្អរូបគេបាន ដើរចូលទៅលើកកង់នោះចេញរួចជិះ ចេញដោយសុវត្ថិភាពហើយយកទៅ លក់បាន១០ដុល្លារដោយឱ្យប្រពន្ធ២ម៉ឺនរៀលនិង២ម៉ឺនទៀតយកទៅទិញថ្នាំញៀនជក់ លុះដល់ថ្ងៃទី៣០ វិច្ឆិកា វេលាម៉ោង ៧យប់ក៏ត្រូវសន្ដិសុខយាមក្នុងបុរីឃាត់ ខ្លួនយកមកប៉ុស្ដិ៍ចោមចៅតែម្ដង។
ក្រោយពេលកើតហេតុជនសង្ស័យ ត្រូវបានសន្ដិសុខបញ្ជូនមកប៉ុស្ដិ៍នគរ បាលរដ្ឋបាលចោមចៅដើម្បីកសាង សំណុំរឿងចាត់ការតាមផ្លូវច្បាប់ ៕
ដោយ៖ សុខា សែនជ័យ
