រដ្ឋមន្ត្រីក្រសួងការពារជាតិរុស្ស៊ី លោក Sergei Shoigu កាលពីថ្ងៃទី១ ខែធ្នូ ឆ្នាំ២០១៥បានប្រកាសថា រុស្ស៊ីបានចាប់ផ្តើមសាងសង់បន្ទាយយោធា២ប្រកបដោយលក្ខណៈទំនើបស្ថិតនៅបរិវេណភាគខាងកើត មិនឆ្ងាយប៉ុន្មានពីដែនកោះគូរីល ។ សកម្មភាពនេះបានកើតឡើង នៅក្រោយពីតំបន់ដែនកោះគូរីលនោះកំពុងតែមានការប្រឈមតានតឹងខ្លាំងឡើង និងជាយូរមកហើយរវាងរដ្ឋាភិបាលជប៉ុន នឹងរុស្ស៊ីដែលទាមទារសិទ្ធិគ្រប់គ្រងដែនកោះគូរីលនោះ ។
គេហទំព័ររបស់ក្រសួងការពារជាតិរុស្ស៊ីបានផ្សព្វផ្សាយដោយដកស្រង់សេចក្តីប្រកាសរបស់រដ្ឋមន្ត្រីក្រសួងការពារជាតិរុស្ស៊ី បន្ទាប់ពីជំនួបថ្នាក់កំពូលរវាងមន្ត្រីយោធាជាន់ខ្ពស់រុស្ស៊ីនោះថា រុស្ស៊ីចាប់ផ្តើមស្ថាបនាបន្ទាយយោធាប្រកបដោយលក្ខណៈទំនើបស្ថិតនៅលើដែនកោះ Iturup និងដែនកោះ Kunashir ។
ទំនាក់ទំនងរវាងទីក្រុងមូស្គូ នឹងតូក្យូបានជាប់គាំងមិនរលូនទៅមុខអូសបន្លាយពេលវេលារាប់ទសវត្សរ៍កន្លងមកហើយដោយសារតែការទាមទារសិទ្ធិគ្រប់គ្រងដែនកោះតូចៗ៤ ស្ថិតនៅភាគខាងត្បូងបំផុតនៃដែនកោះគូរីល ឬដែលជប៉ុនស្គាល់ថា ជាដែនដីភាគខាងជើងនោះ ។
កងទ័ពរបស់រុស្ស៊ីប្រមាណ១៩.០០០នាក់ឈរជើងនៅដែនកោះដាច់ស្រយ៉ាល់ដែលកាន់កាប់ដោយសូវៀតនោះបានបាត់បង់ជីវិតនៅក្នុងសង្គ្រាមលោកលើកទី២ ។ ប្រទេសទាំងពីរ រុស្ស៊ី ជប៉ុនមិនទាន់មានសន្ធិសញ្ញាសន្តិភាពផ្លូវការណាមួយទេ ហើយតែងតែមានមានការប្រឈមមុខតានតឹងដាក់គ្នានោះទៅលើបញ្ហាគ្រប់គ្រងដែនកោះខាងលើនេះ ។ បញ្ហានេះផងដែរធ្វើឲ្យគាំងដំណើរលើកិច្ចព្រមព្រៀងពាណិជ្ជកម្មអូសបន្លាយពេលរាប់ទសវត្សរ៍ ។
រុស្ស៊ីអះអាងថា ការស្ថាបនាបន្ទាយយោធាទាំងនោះនឹងផ្តល់អត្ថប្រយោជន៍យ៉ាងច្រើននៅក្នុងការជួយដល់កងកម្លាំងរុស្ស៊ីដែលឈរជើងនៅព្រំដែនភាគខាងកើត ៕
ប្រែសម្រួល៖ ថាច់ យ៉ាត
