ភ្នំពេញ៖ រនាំងដែកពុះចែកទ្រូងផ្លូវចំនួន ១៦ផ្ទាំងបានបាក់ដាច់ចេញពីគ្នារាយប៉ាយពេញផ្លូវ ដោយសាររថយន្តកាមរីបាឡែនមួយគ្រឿងបើកលឿនវ៉ាជែងគ្នា ជ្រុកទៅបុកពេញទំហឹង ហើយរថយន្ដបានបន្ថែមល្បឿនរត់គេចខ្លួនបាត់ ។

ហេតុការណ៍នេះបានកើតឡើងកាលពីវេលាម៉ោង២២ និង៤០នាទីយប់ថ្ងៃ៣ ខែធ្នូ ឆ្នាំ២០១៥ នៅមុខហាងសាច់អាំង១៦៨ តាមបណ្តោយផ្លូវសហព័ន្ធរុស្សី ស្ថិតក្នុងសង្កាត់ទឹកថ្លា ខណ្ឌសែនសុខ ។

តាមប្រភពព័ត៍មានពីកន្លែងកើតហេតុ បានអោយដឹងថា នៅពេលកើតហេតុគេបានឃើញរថយន្តកាមរីបាឡែនមួយគ្រឿងមិនចាំស្លាកលេខ បើកប្រដេញគ្នាជាមួយរថយន្តមួយគ្រឿងទៀត បើកចុះពីលើស្ពានអាកាស៧មករា ទិសដៅពីកើតទៅលិច លុះមកដល់ចំណុចកើតហេតុ រថយន្តបង្កបានបើកវ៉ាជែងគ្នាបណ្ដាលអោយរ៉េចង្កូតទៅបុករះរនាំងដែក បាក់អស់១៤ផ្ទាំងធ្លាយទៅម្ខាងផ្លូវ ហើយរថយន្តបើកទៅមុខជាង ៥០ម៉ែត្ររថយន្តរ៉េចង្កូតមកស្តាំដៃបុករនាំងបាក់អស់២ផ្ទាំងថែមទៀត ។ បន្ទាប់មករថយន្តបង្កបានបន្ថែមល្បឿនបើករត់គេចខ្លួនបាត់ស្រមោលតែម្ដង ។

ក្រោយពេលកើតហេតុ សមត្ថកិច្ចបានត្រឹមតែមករាប់រនាំងដែកនិង លើករនាំងដែកដែលបាក់ចេញពីផ្លូវ ដើម្បីកំុអោយមានគ្រោះថ្នាក់ដល់អ្នកធ្វើដំណើរថែមទៀតតែប៉ុណ្តោះ ៕

ដោយ៖ សុខា​ សែនជ័យ​