ខេត្តបាត់ដំបង ៖ ប្រធានអង្គការការពារបរិស្ថានម្នាក់ក្លែងខ្លួនបន្លំជាយោធាពាក់ផ្កាយ២បានរងការចាប់ខ្លួនពីកម្លាំងអាវុធហត្ថខេត្តបាត់ដំបងពីបទ ឆបោកប្រាក់ប្រជាពលរដ្ឋជាង១ម៉ឺន ដូល្លាដើម្បីរត់ការ ចូលកងទ័ព ។ ជនសង្ស័យនៅព្រឹកថ្ងៃទី២៨ ខែមករា ឆ្នាំ២០១៩ ត្រូវបានចាប់បញ្ជូនទៅ កាន់តុលាការដើម្បី ចាត់ការ តាមផ្លូវច្បាប់។
បើតាមប្រភពព័ត៌មានពីមន្រ្តី អាវុធហត្ថខេត្តបាត់ដំបង ប្រាប់ឱ្យដឹងថា ជនសង្ស័យឈ្មោះ ទេព ពេជ្រ ហៅទេព វិសាល ភេទ ប្រុស អាយុ៥៩ឆ្នាំ មុខរបរប្រធានអង្គការការពារបរិស្ថាន រស់នៅភូមិ ដាំស្ពៃ សង្កាត់ស្លាកែត ក្រុងបាត់ដំបង ខេត្តបាត់ឌំបង បានរងការចាប់ខ្លួនកាលពីថ្ងៃទី២៥ ខែមករា ឆ្នាំ២០១៩ នៅស្រុកសំឡូត ខេត្តបាត់ដំបង ។
អនុវត្តតាម បណ្តឹងរបស់ប្រជាពល រដ្ឋដែលជា ជនរង គ្រោះ៤នាក់ ពីបទឆបោកប្រាក់សរុប១០៦០០ដូល្លាជាថ្នូរត់ការចូលកងទ័ពប្រព្រឹត្តកាលពី អំឡុង ខែ មិថុនា ឆ្នាំ២០១៨ ស្ថិតនៅ ភូមិដាំស្ពៃ សង្កាត់ស្លាកែត ក្រុងបាត់ដំបង។ ជនរងគ្រោះទាំង៤នាក់ រងការឆបោក ជនសង្ស័យមាន ឈ្មោះ១,គឹមហឿង ភេទប្រុស អាយុ៣០ឆ្នាំ មុខរបរលក់ដូរ រស់នៅស្រុកថ្មគោល ខេត្តបាត់ដំបង ២, ឈីវ ប៊ុនឆៃ ភេទប្រុសអាយុ៥៦ឆ្នាំ មុខរបរសំណង់ រស់នៅស្រុកស្វាយចេក ខេត្តបន្ទាយមានជ័យ ៣, ប្រាក់ សំអេន ភេទប្រុសអាយុ៥៥ឆ្នាំ ប្រកបមុខរបរ ធ្វើស្រែ រស់នៅក្រុងពោធិ៍សាត់ ខេត្តបាត់ដំបង និង៤,ប៉ា សូវៀត ភេទ ប្រុស អាយុ៣០ឆ្នាំ មុខរបរ លក់ដូរ រស់នៅក្រុងសិរីសោភ័ណ ខេត្តបន្ទាយមានជ័យ។
បើតាមប្រភពព័ត៌មានដដែលឱ្យដឹងទៀតថា ជនសង្ស័យបានក្លែងលិខតឯកសារកងទ័ព ដើម្បី ធ្វើសកម្មភាពឆបោកប្រជាពលរដ្ឋមួយចំនួនថែមទៀត ជនសង្ស័យរូបនេះឆបោកចំពោះ ប្រជា ពលរដ្ឋមួយចំនួន មិនបាន យល់ដឹងនិងខ្វះការពិចារណា។
ជុំវិញករណីឆបោករត់ការចូលបំរើកងទ័ពសមត្ថកិច្ចក៏បានអំពាវនាវប្រជាពលរដ្ឋត្រូវមានការ ប្រុងប្រយ័ត្នរងគ្រោះបាត់បង់ថវិកាចំពោះជនខិលខូចដែលមានគំនិតមិនល្អ ប្រើកលល្បិចគ្រប់រូបភាព ដើម្បីរត់ការធ្វើការងារនេះការ ងារនោះរឺសមត្ថកិច្ចជាដើមនោះ ៕ សំ វិច្ឆិកា
