ភ្នំពេញ ៖ ស្ថានភាពអាកាសធាតុនៅព្រះរាជាណាចក្រកម្ពុជាចាប់ពីថ្ងៃទី២៩ ខែមករា រហូតដល់ថ្ងៃទី៥ ខែកម្ភៈ ឆ្នាំ២០១៩ នឹងចាប់ផ្តើមមានកំណើនកម្តៅឡើងវិញ បន្ទាប់ពីក្រុមព្យាករអាកាសធាតុនៃក្រសួងធនធានទឹក និង ឧតុនិយមរកឃើញថា សម្ពាធខ្ពស់នៅលើប្រទេសចិន នឹងចាប់ផ្តើមថយឥទ្ធិពល ។
នៅក្នុងសេចក្តីជូនដំណឹងរបស់ក្រសួងក្រុមអ្នកព្យាកអាកាសធាតុរកឃើញថា ព្រះរាជាណាចក្រកម្ពុជា នឹងមាន កំណើនកម្តៅឡើងវិញ ក្នុងនោះមានបណ្តាខេត្តនានាដែលនៅតាមតំបន់ខ្ពង់រាប និង តំបន់ភ្នំ សីតុណ្ហភាព អប្បបរមា នឹងចាប់មានពី២០ទៅ២២អង្សាសេ និងសីតុណ្ហភាពអតិបរមាមានពី២៩ ទៅ៣២អង្សាសេ និង បណ្តារាជធានី-ខេត្តដទៃទៀត មានសីតុណ្ហភាពអប្បបរមា ពី២៣-២៥អង្សាសេ និងសីតុណ្ហភាពអតិបរមាមានពី៣១-៣៣អង្សាសេ ។ ចំណែកតំបន់ដែលនៅជាប់តាមដងទន្លេ មាន តំបន់ជុំវិញបឹងទន្លេសាប តំបន់ខ្ពង់រាប និងតំបន់ភ្នំ នឹងមានចុះអ័ព្ទនៅពេលព្រឹក ៕ ដោយ ៖ ជាយក្រុង
