ខេត្តកោះកុង: ភ្លៀងមួយមេធំលាយឡំដោយខ្យល់កន្រ្តាក់បង្កឲ្យមានរន្ទះបាញ់ត្រូវចំស្រី្តម្នាក់បណ្ដាលឲ្យរងរបួសធ្ងន់ និងសត្វគោចំនួន៦ក្បាលងាប់រដូករដែលតាមភ្លឺស្រែ ។
ឧបទ្ទវហេតុគ្រោះធម្មជាតិដែលបណ្តាលឲ្យមានរន្ទះបាញ់ត្រូមនុស្សរបួសធ្ងន់ម្នាក់និងធ្វើឲ្យសត្វគោចំនួន៦ ក្បាលងាប់រដូករដែលតាមភ្លឺស្រែនេះកើតឡើងកាលពីវេលាម៉ោង២រសៀល ថ្ងៃព្រហស្បតិ៍ ១៣រោច ខែចេត្រ ឆ្នាំ កុរ ឯកស័ក ព.ស.២៥៦២ ត្រូវនឹងថ្ងៃទី២ ខែឧសភា ឆ្នាំ ២០១៩ស្ថិតក្នុងភូមិសុវណ្ណបៃតង និងភូមិប្រលាន ឃុំកណ្ដោល ស្រុកបុទុមសាគរ ខេត្តកោះកុង។
មន្ត្រីនគរបាលស្រុកបុទុមសាគរបានឲ្យដឹងថា ជនរងគ្រោះមានឈ្មោះ ឡុច សុឃុន ភេទស្រី អាយុ ៣៣ឆ្នាំ មានទីលំនៅកន្លែងកើតហេតុខាងលើបានរងរបួសធ្ងន់ ដោយកំសួលរន្ទះបាញ់ ពេលកំពុងធ្វើដំណើរតាមផ្លូវពេលមានភ្លៀងផ្គរជិតដល់ផ្ទះទៅហើយនោះ។ ជនរងគ្រោះរូបនេះ ត្រូវបានសាច់ញាតិនិងអ្នកភូមិសែងយកទៅដល់ក្នុងផ្ទះ និងបាន ហៅគ្រូពេទ្យមកជួយសង្រ្គោះឲ្យដឹងខ្លួនឡើងវិញ អស់រយៈពេលច្រើនម៉ោង ។
ចំណែកសត្វគោចំនួន៦ក្បាលរបស់ប្រជាពលរដ្ឋក្នុងភូមិនេះដែលកំពុងដើរស៊ីស្មៅតាមវាលស្រែ ត្រូវរន្ទះបាញ់ចំហ្វូងបណ្តាលឲ្យដួលងាប់ជាបន្តបន្ទាប់យ៉ាងរដូករណែលផងដែរ៕
