ខេត្តស្វាយរៀង៖ អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀង លោកអ៊ូ សុខខឿន បានថ្លែងអោយដឹងនៅព្រឹកថ្ងៃទី២០ ខែធ្នូ ឆ្នាំ២០១៥ ថា បើពុំមានការប្រែប្រួលទេ កម្មករ កម្មការិនីនៅរោងចក្រក្នុងតំបន់សេដ្ឋកិច្ចពិសេសតាយសេង និងមែនហាតធេន នឹងចូលធ្វើការនៅថ្ងៃច័ន្ទ ទី២១ ខែធ្នូ ឆ្នាំ២០១៥ ជាក់ជាមិនខានឡើយ ដោយសារមានកិច្ចប្រជុំរវាងអាជ្ញាធរ នឹងភាគីទាំងសងខាងដើម្បីដោះស្រាយបញ្ចៀសអំពើហិង្សាផ្សេងៗដែលកើតឡើង។
លោកអ៊ូ សុខខឿន បានបន្តទៀតថា ការទាមទាររបស់កម្មករ កម្មការិនី ដើម្បីដំឡើងប្រាក់ខែក្នុងមួយខែ២០ដុល្លារនោះ មិនទាន់មានការយល់ព្រមពីភាគីខាងរោងចក្រទេ ដោយការដំឡើងប្រាក់ខែនេះ គ្រាន់តែឮពាក្យចចាមអារ៉ាមនិយាយតៗគ្នាតែប៉ុណ្ណោះ ពុំមានប្រភពច្បាស់លាស់ ចេះតែនាំគ្នាធ្វើបាតុកម្មតាមការញុះញង់របស់ជនអគតិមួយចំនួនតែប៉ុណ្ណោះហើយកាលពីថ្ងទី១៩ ខែធ្នូ នៅក្នុងតំបន់សេដ្ឋកិច្ចពិសេសមែនហាតធេន ចំនួន២៦រោងចក្រ មានតែ៧រោងចក្រទេ ដែលមិនចូលធ្វើការ រីឯនៅតំបន់តាយសេងមានដោយ១០រោងចក្រអត់ធ្វើការ រីឯ៩រោងចក្រទៀតចួលធ្វើការជាធម្មតា តាំងពីព្រឹករហូតដល់ល្ងាច។
គូបញ្ជាក់ថា ការធ្វើកូដកម្មនេះអស់រយៈពេល៤ថ្ងៃមកហើយ ដោយគិតតាំងពីថ្ងៃទី១៦ ខែធ្នូ រហូតដល់១៩ ខែធ្នូ ឆ្នាំ២០១៥ ដែលមានក្រុមកម្មករ កម្មការិនីរាប់ពាន់នាក់ និងបានប្រើអំពើហិង្សាគប់ដុំថ្មចូលក្នុងរោងចក្របណ្ដាលអោយខូចខាតសំភារៈមួយចំនួន និងបង្ខំអោយកម្មកររោងចក្រផ្សេងទៀតដែលធ្វើការនោះ មកចូលរួមធ្វើកូដកម្មជាមួយពួកគេដែរ។
ចំណែកខាងអាជ្ញាធរខេត្តស្វាយរៀងក៏បានចាត់អោយសមត្ថកិច្ចចំរុះចុះ រៀបរយសណ្ដាប់ធ្នាប់ និងទប់ស្កាត់រាល់អំពើហិង្សាដែលបង្កឡើងដោយជនឆ្លៀតឱកាសមួយចំនួនផងដែរ ៕
ដោយ៖ យឹម សុថាន
