ភ្នំពេញ៖ កម្លាំងនគរបាលខណ្ឌពោធិ៍សែនជ័យបាននាំគ្នាដេញចាប់ជនយុវជន២នាក់ដោយសង្ស័យជាមុខសញ្ញាប្លន់ធ្វើអោយផ្អើលពេញមួយខណ្ឌដោយសារតែពួកគេជិះម៉ូតូអត់ស្លាកលេខ ខណៈសមត្ថកិច្ចឃាត់បែរជាពួកគេព្យាយាមជិះរត់ ។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១០យប់ ថ្ងៃទី២០ ខែធ្នូ ឆ្នាំ ២០១៥ នៅចំណុចរង្វង់មូលចោមចៅ សង្កាត់ចោមចៅ ខណ្ឌពោធិ៍សែនជ័យ។
តាមសំដីពីកម្លាំងសមត្ថកិច្ចបានអោយដឹងថា នៅមុនពេលកើតហេតុរួបគាត់មានគ្នា២បានជិះម៉ូតូ១គ្រឿងល្បាតតាមដងផ្លូវ ស្រាប់តែឃើញជនសង្ស័យមានគ្នា៤នាក់ជិះម៉ូតូ២គ្រឿង មួយគ្រឿងម៉ាកស៊ូយសាគីនិច និងមួយគ្រឿងទៀតម៉ាកហុងដាឌ្រឹម សេរីឆ្នាំ២០១៥ ពណ៍ខ្មៅ គ្មានស្លាកលេខ ដោយឃើញដូចនោះមានការសង្ស័យក៏បានហៅអោយឈប់ឆែកឆេរ តែបែរជាពួកគេបានជិះម៉ូតូរត់គេចទៅវិញ ។
សមត្ថកិច្ចបានបន្តទៀតថា ភ្លាមនោះរួបគាត់បានជិះម៉ូតូដេញតាំងចំណុចរង្វង់មូលចោមចៅរហូតមកដល់មុខអាកាសយាន្តដ្ឋានអន្តរជាតិភ្នំពេញ ជនសង្ស័យក៏បានធាក់ម៉ូតូសមត្ថកិច្ចបណ្តាលអោយសមត្ថកិច្ចម្នាក់ធ្លាក់ពីលើម៉ូតូ ។ បន្ទប់មកពួកគេក៏បានជិះម៉ូតូបំបែកផ្លូវគ្នា ដោយជនសង្ស័យ២នាក់ជិះម៉ូតូហុងដាឌ្រឹមបានឆ្ពោះទៅផ្សារសិនជូរី ទើបកម្លាំងសមត្ថកិច្ចបានទាក់ទងតាមរយៈវិទ្យុទាក់ទងចាំស្ទាក់ ខណៈជិះទៅដល់មុខផ្សារសិនជូរី ពួកគេក៏ត្រឡប់ក្រោយវិញតាមបណ្តោយផ្លូវសហព័ន្ធរុស្សីទៅរង្វង់ចោមចៅវិញ។
សមត្ថកិច្ចបានបន្តទៀតថា ដោយមានការបញ្ជាផ្ទាល់ពីលោក យឹម សារ៉ាន់ អធិការខណ្ឌពោធិ៍សែនជ័យ អោយបន្ថែមកម្លាំងដើម្បីតាមចាប់ជនសង្ស័យខាងលើយកមកសួនាំអោយខានតែបាន លុះបានមួយសន្ទុះក្រោយមកទើបប្រទះឃើញជនសង្ស័យនៅច្រកចូលសាលាសុវណ្ណភូមិទើបឃាត់បានទាំង២នាក់តែម្តង។
ក្រោយពេលកើតហេតុជនសង្ស័យទាំង២នាក់ត្រូវបានសមត្ថកិច្ចឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌពោធិ៍សែនជ័យដើម្បីរង់ចាំសាកសួរបន្ត ៕
ដោយ៖ សុខាសែនជ័យ
