ភ្នំពេញ ៖ ជាថ្មីម្តងទៀត សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសអរគុណដល់កាកបាទក្រហមកម្ពុជា ,សមាគម ,អង្គការ ,ម្ចាស់ក្រុមហ៊ុន និងសប្បុរសជនទាំងអស់ ព្រមទាំងអាជ្ញាធរ កងកម្លាំងសមត្ថកិច្ច ,អ្នកស្ម័គ្រចិត្ត ដែលបានចូលរួមទាំងកម្លាំងកាយកម្លាំងចិត្ត និងថវិកាជួយដល់ពលរដ្ឋយើងនៅក្នុងស្ថានភាពដ៏លំបាកនេះ ដើម្បីជួយទ្រទ្រង់ដល់ជីវភាពបងប្អូនរងគ្រោះដោយបាក់រលំអគារ នៅខេត្តព្រះសីហនុ កាលពីថ្ងៃទី២២ ខែមិថុនា ឆ្នាំ២០១៩ ។
ជាទម្លាប់នៅចុងសប្តាហ៍ សម្តេចតេជោតែងមានប្រសាសន៍តាមរយៈសារនៅលើទំព័រហ្វេសប៊ុកថា សុខប្បាយជាទេបងប្អូនជនរួមជាតិ? ខ្ញុំសូមឆ្លៀតឱកាសនេះ អរគុណជាថ្មីម្តងទៀត ដល់កាកបាទក្រហមកម្ពុជា សមាគម អង្គការ ម្ចាស់ក្រុមហ៊ុន និងសប្បុរសជនទាំងអស់ ដែលបានចូលរួមបរិច្ចាគថវិកា ជួយដល់បងប្អូនរងគ្រោះដោយអគារបាក់រលំនៅខេត្តព្រះសីហនុ កាលពីថ្ងៃទី២២ ខែមិថុនា ឆ្នាំ២០១៩។
តាមការអំពាវនាវរបស់ខ្ញុំកន្លងមក គឺយើងបានទទួលមូលនិធិជាងពីរលានដុល្លារ ហើយកំពុងរៀបចំចាត់ចែងផ្តល់ជូនទៅពលរដ្ឋរងគ្រោះ គឺទាំងអ្នករងរបួស និងក្រុមគ្រួសារសព។ ការបរិច្ចាគទានរបស់បងប្អូន នឹងជួយជីវិតអ្នកដែលនៅរស់ រួមទាំងក្រុមគ្រួសាររបស់សព អាចមានលទ្ឋភាពកសាងជីវភាពរស់នៅបានល្អប្រសើរ។
អរគុណដល់បងប្អូនជនរួមជាតិទាំងអស់ រួមទាំងអាជ្ញាធរ កងកម្លាំងសមត្ថកិច្ច និងអ្នកស្ម័គ្រចិត្តដែលបានចូលរួមទាំងកម្លាំងកាយ កម្លាំងចិត្ត និងថវិកាជួយដល់ពលរដ្ឋយើងនៅក្នុងស្ថានភាពដ៏លំបាកនេះ។
សូមជូនពរបងប្អូន ជួបតែសេចក្តីសុខ សំណាងល្អ និងបានសប្បាយរីករាយក្នុងថ្ងៃឈប់សម្រាកចុងសប្តាហ៍គ្រប់ៗគ្នា ៕
