ខេត្ដបាត់ដំបង៖ ស្រូវប្រាំងទំហំ ប្រមាណ៦០០ហិកតាដែលកំពុងតែ ផើមជិតចេញផ្លែរបស់ប្រជាកសិករនៅ ស្រុកថ្មគោល ខេត្ដបាត់ដំបង ប្រឈម នឹងការខូចខាតក្នុងរយៈពេលប្រមាណ ២សបា្ដហ៍ខាងមុខទៀត ដោយសារដី បែកក្រហែងហើយគ្មានទឹកដាក់បញ្ចូល ស្រែជាង១០ថ្ងៃមកហើយ បើគិតត្រឹម ថ្ងៃទី២២ ខែធ្នូ ឆ្នាំ២០១៥ ។
ប្រជាកសិករជាច្រើនគ្រួសារនៅស្រុកថ្មគោលកំពុងព្រួយបារម្ភ ដោយខ្លាច ដើមស្រូវរបស់ពួកគាត់ងាប់អស់ធ្វើឱ្យ ពួកគាត់មិនអាចទទួលបានផល ហើយ គ្មានប្រាក់បង្វិលសងគេដែលបានខ្ចីទិញ ជីដាក់ស្រែនាពេលកន្លងទៅ ។
ស្ដ្រីឈ្មោះ ហៀង ច្រិប ដែលមានវ័យ ជិត៥០ឆ្នាំម្នាក់រស់នៅក្នុងភូមិគោកត្រប់ ឃុំតាម៉ឺន ស្រុកថ្មគោលបានឱ្យដឹងថា ស្រូវប្រាំងរបស់គាត់ចំនួន៣ហិកតា ចំណាយដើមទុនអស់ជិត៣លានរៀល ហើយរំពឹងថានឹងបានផលដោះស្រាយ ជីវភាពគ្រួសារប្រចាំថ្ងៃ ។ ស្ដ្រីរូបនេះ បន្ដថា ស្រូវរបស់គាត់ខ្វះទឹកជាង១០ ថ្ងៃទៅហើយ ហើយបើនៅពុំមានទឹក ដាក់ទៀតស្រូវនឹងខូចអស់ ហើយក៏ពុំដឹង ថារកប្រាក់ឯណាសងបំណុលគេបានដែរ ។
លោក ដួង គិមអ៊ាត មេភូមិគោក ត្រប់បានមានប្រសាសន៍ថា ស្រូវប្រាំង ប្រមាណជា៦០០ហិកតារបស់ប្រជា កសិករជាង៣០០គ្រួសារនៅក្នុងភូមិ គោកត្រប់ ឃុំតាម៉ឺន ស្រុកថ្មគោល ខេត្ដបាត់ដំបងប្រឈមមុខនឹងខូចខាត ក្នុងរយៈពេលប្រមាណ ២សបា្ដហ៍ខាងមុខ ប្រសិនបើពុំមានទឹកដាក់បញ្ចូលស្រែ ទាន់ពេល ។ ក្នុងនោះដីស្រែរបស់អ្នកភូមិខ្លះ បែកក្រហែងហើយដើមស្រូវឡើងក្រហមស្រពោនស្វិតបណ្ដើរៗដោយសារខ្វះទឹកបញ្ចូលស្រែជាច្រើនថ្ងៃ ។ រូបលោកនិង ប្រជាពលរដ្ឋបានស្នើសុំទៅអាជ្ញាធរ ស្រុកឱ្យជួយអន្ដរាគមន៍បង្ហូរទឹកប្រឡាយពីស្រុកបវេលដើម្បីបញ្ចូលស្រែជាច្រើនលើកច្រើនសាមកហើយតែពុំទាន់ទទួលបានទឹកនៅឡើយ ។
ដោយឡែក លោក គង់ លី អភិបាល ស្រុកថ្មគោលបានមានប្រសាសន៍ទទួលស្គាល់ថា ស្រូវប្រាំងរបស់ប្រជាកសិករ នៅឃុំតាម៉ឺនរាប់រយហិកតា ពិតជាខ្វះ ទឹកដាក់ស្រែប្រាកដមែន ។ ប៉ុន្ដែលោក អះអាងថា មូលហេតុបែងចែកទឹកយឺត យ៉ាវដោយសារប្រឡាយមេបង្ហូរទឹកពី ស្រុកបវេលមកឃុំតាម៉ឺនឆ្ងាយ ហើយ ថាអាជ្ញាធរស្រុកកំពុងដោះស្រាយលើការងារនេះជូនប្រជាពលរដ្ឋទាំងនោះហើយ ។
ទោះបីជាយ៉ាងណាក៏ដោយប្រជាពលរដ្ឋប្រមាណជាង៣០០គ្រួសារក៏បាន ទទូចសំណូមពរដល់អាជ្ញាធរពាក់ព័ន្ធ មេត្ដាក្រឡេកមើលនិងចាត់កម្លាំងអន្ដរាគមន៍ជួយសង្គ្រោះស្រូវរបស់ពួកគាត់ ផង បើពុះនោះទេពួកគាត់នឹងជួបវិបត្ដិ សេដ្ឋកិច្ចយ៉ាងធ្ងន់ធ្ងរ ៕
ដោយ៖ សហការី
