ភ្នំពេញ៖ បុរសម្នាក់ទំនងជាស្រវឹងស្រាបានបើករថយន្តហាយប្រ៊ីដក្នុងល្បឿនលឿនបានជ្រុលចង្កូតទៅបុករថយន្តឡង់គ្រីសស័រចំពីមុខពេញទំហឹងបណ្តាលអោយរងការខូចខាតយ៉ាងដំណំ និងបុរសម្នាក់បានរងរបួសធ្ងន់ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ ។

ហេតុការណ៍នេះបានកើតឡើងកាលពីវេលាម៉ោង៩ និង៣០នាទីយប់ថ្ងៃទី២២ ខែធ្នូ ឆ្នាំ២០១៥ ក្នុងបរិវេណកោះពេជ្រ ស្ថិតក្នុងសង្កាត់ទន្លេបាសាក់ ខណ្ឌចំការមន ។

បើតាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញរថយន្តហាយប្រ៊ីដគ្មាន ពាក់ស្លាកលេខ ភ្នំពេញ បើកបរដោយបុរសម្នាក់ទំនងជាស្រវឹងស្រា ហើយបានបើកក្នុងល្បេឿនយ៉ាងលេឿន ពេលមកដល់ចំណុចកើតហេតុក៏បុករថយន្តឡង់គ្រីសស័រ ពណ៍ខ្មៅ ពាក់ស្លាកលេខ សៀមរាប 2A -4842 ចំពីមុខពេញទំហឹងរងការខូចខាតយ៉ាងដំណំ ។

ប្រភពដដែលបានបន្តថា ពេលនោះរថយន្តឡង់គ្រីសស័រជាប់ចង្កឹសលេខរយ៉ែ ក៏បានថយបុករថយន្តកង់១០មួយគ្រេឿងទៀតដែលចតស្ងៀម ចំណែកបុរសដែលជាអ្នកបើករថយន្តបង្កគៀបជាប់រថយន្តរងរបួសធ្ងន់ ហើយត្រូវបានប្រជាពលរដ្ឋជួយយកចេញ រួចរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ ។

ក្រោយមកសមត្ថកិច្ចជំនាញបានចុះមកធ្វើការវាស់វែងនិងយករថយន្តទាំង២គ្រេឿងទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយនាពេលក្រោយ រីឯម្ចាស់រថយន្តកង់១០ដោយសារតែរថយន្តមិនខូចខាតក៏មិនទាមទារសំណងអ្វីឡើយ ៕

ដោយ៖ ភារ៉ា ដង្កោ