ក្រុមឧទ្ទាម នៅក្នុងប្រទេសប៉ាគីស្ថាន បានបើកការវាយប្រហារភេរវកម្ម សម្លាប់មនុស្សជាច្រើន កាលពីយប់ថ្ងៃទី២៣ខែកក្កដា ស្ថិតនៅទីក្រុង Quatta ។ ការវាយប្រហារដោយគ្រាប់បែកកែឆ្នៃនោះបានសម្លាប់មនុស្ស៣នាក់និង របួស ២៤នាក់។
សារព័ត៌មានស៊ីនហួរ នៅព្រឹកថ្ងៃទី ២៤ខែកក្កដាបាន ដកស្រង់សម្តី លោក Waseem Baig អ្នកនាំពាក្យ នៃមន្ទីរពេទ្យស៊ីវិលទីក្រុង Quetta បានបញ្ជាក់ថា ស្ថានភាពរបួសរបស់អ្នកជំងឺ គឺពុំមានអ្វីប្រែប្រួល ទេ ពួកគាត់ទទួលការព្យាបាល និងផ្តល់ថ្នាំពេទ្យយ៉ាងយកចិត្តទុកដាក់ ។
លោក Abdul Razzaq Cheema អគ្គនាយករងប៉ូលិសស៊ើបអង្កេតរបស់ប៉ាគីស្ថានបានថ្លែងប្រាប់ប្រភពព័ត៌មានក្នុងស្រុកថា ការវាយប្រហារនេះបានកើតឡើងនៅផ្លូវ Eastern Bypass ដែលចរាចរណ៍មានការមមាញឹក ជាផ្លូវស្ថិតនៅក្នុងទីប្រជុំជន ភាគអាគ្នេយ៍ខេត្ត Balochistan ។ ពួកជនវាយប្រហារបានបង្កប់គ្រឿងផ្ទុះ (គ្រាប់បែកច្នៃ)នៅនឹងម៉ូតូមួយគ្រឿង ចតនៅខាងក្រៅហាងមួយកន្លែងរួចបំផ្ទុះ។
ជាទូទៅនៅតាមទីសាធារណៈហាក់កំពុងក្លាយជាគោលដៅវាយប្រហាររបស់ក្រុមឧទ្ទាម ដើម្បីបង្កចលាចលនៅក្នុងតំបន់ ។ ក្រុមឧទ្ទាមបានវាយប្រហារដោយបំផ្ទុះគ្រាប់បែកឡើងវិញ ក្រោយស្ងប់ស្ងាត់មួយរយៈពេល ការវាយប្រហារបែបនេះនៅក្នុងតំបន់ ។ មិនមានក្រុមណាមួយប្រកាសទទួលស្គាល់ការវាយប្រហារនេះនៅឡើយទេ ប៉ុន្តែក្រុមវាយប្រហារបែបនេះនាគ្រាកន្លងមក ច្រើនតែជាក្រុមឧទ្ទាមជាតិនិយម Balock ។
ទីក្រុង Quetta រួមជាមួយទីក្រុងដទៃផ្សេងទៀត ធ្លាប់ជាទីតាំងដ៏ក្តៅគគុកបង្កសកម្មភាពភេរវកម្មរបស់ក្រុមឧទ្ទាម ។ ប៉ុន្តែក្រោយប្រតិបត្តិការយោធារយៈពេលវែង និងផែនការសកម្មភាពជាតិប្រឆាំងឧទ្ទាមរបស់រដ្ឋាភិបាលប៉ាគីស្ថាន បានជួយឲ្យកាត់បន្ថយសកម្មភាពភេរវកម្មខ្លះៗ និងបានពង្រីកវិសាលភាពគ្រប់គ្រង ក្នុងនោះមានរួមបញ្ចូលទីក្រុង Quetta ផងដែរ ៕
