ភ្នំពេញ៖នាយករដ្ឋមន្ត្រីនៃកម្ពុជា សម្តេចតេជោ ហ៊ុន សែន នៅថ្ងៃទី៣០ ខែកក្កដា នេះ មានប្រសាសន៍សាជាថ្មី ដោយសូមបងប្អូនប្រជាពលរដ្ឋកុំមានការព្រួយបារម្ភក្នុងការទទួលទានសាច់ជ្រូក ព្រោះ “ជំងឺប៉េស្ដ្រជ្រូកអាហ្វ្រិក មិនមានឆ្លងមកមនុស្សទេ វាឆ្លងតែជ្រូកដូចគ្នាតែប៉ុណ្ណោះ” ។

សម្ដេចតេជោ ហ៊ុន សែន កាលពីព្រឹកថ្ងៃទី២៩ ខែកក្កដា ម្សិលមិញនេះ ក្នុងឱកាសអញ្ជើញពិនិត្យការដ្ឋានសាងសង់ពហុកីឡដ្ឋានជាតិ “មរតកតេជោ” សម្តេច បានមានប្រសាសន៍អំពាវនាវឲ្យប្រជាពលរដ្ឋបន្ដបរិភោគសាច់ជ្រូកដូចធម្មតា។

កុំមានការព្រួយបារម្ភអំពីបញ្ហាជំងឺប៉េស្ដ្រជ្រូកអាហ្វ្រិក ព្រោះតាមការពិនិត្យតាមដានជាប្រចាំរបស់ក្រសួងជំនាញកម្ពុជា មកទល់ពេលនេះគឺ មិនមានឆ្លងមកមនុស្សទេ វាឆ្លងតែជ្រូកដូចគ្នាតែប៉ុណ្ណោះ។

ហ្វេសប៊ុកផេកសម្តេចតេជោ ហ៊ុន សែន សរសេរថា “ក្នុងរយៈពេលប៉ុន្មានសប្ដាហ៍ចុងក្រោយនេះ អាជីវករដែលជាអ្នកចិញ្ចឹមជ្រូកនិងលក់សាច់ជ្រូកបានត្អូញត្អែរខ្លាំងណាស់ ខណៈដែលការលក់សាច់ជ្រូកមានការធ្លាក់ចុះជាបន្ដបន្ទាប់ ក្រោយពីមានការផ្ទុះជំងឺប៉េស្ដ្រជ្រូកអាហ្វ្រិក ដែលបានធ្វើឲ្យប្រជាពលរដ្ឋផ្អាក ឬកាត់បន្ថយការទទួលទានសាច់ជ្រូក។

សម្តេចតេជោ ហ៊ុន សែន បានបញ្ជាក់ថា សម្រាប់ជ្រូកស្លាប់ដែលមានផ្ទុកជំងឺប៉េស្ដ្រជ្រូកអាហ្វ្រិក គឺមិនត្រូវបានអនុញ្ញាតឲ្យធ្វើការលក់ដូរឡើយ ខាងក្រសួង និងស្ថាប័នជំនាញដែលពាក់ព័ន្ធលើបញ្ហានេះបានតម្រូវឲ្យកប់ចោលតែម្ដង ព្រោះជៀសវាងការឆ្លងរីករាលដាលទៅកាន់ជ្រូកផ្សេងទៀតដែលនៅក្បែរនោះ៕ចេស្តា