ខេត្តកំពង់ចាម ៖ ទំនាស់រឿងបង្ហូរទឹកស្រែ ឈានដល់ការប្រើប្រាស់អំពើហិង្សាដាក់គ្នាទៅវិញទៅមក រហូតដល់ភាគីម្ខាងចាប់បុរសម្នាក់ ដែលមានវ័យចំណាស់ជាងខ្លួន ចងដៃ ចងជើង រួចវាយដំ និងជ្រមុជទឹកស្រែ។
ហេតុការណ៍នេះ បានកើតឡើងនៅវេលាម៉ោងជាង១០ព្រឹក ថ្ងៃទី១៤ ខែតុលា ឆ្នាំ២០១៩ ស្ថិតនៅចំណុចដីស្រែ
ក្នុងឃុំផ្តៅជុំស្រុកជើងព្រៃ ខេត្តកំពង់ចាម។
សាក្សីបានឲ្យដឹងថា មុនពេលកើតហេតុគេឃើញបុរសម្នាក់ឈ្មោះ លឹម ឡាំ អាយុ៧០ឆ្នាំ រស់នៅភូមិព្នៅជុំលិច ឃុំផ្តៅជុំ ស្រុកជើងព្រៃ បានទៅកាប់ដីបង្ហូរទឹកចេញពីស្រែរបស់គាត់ឲ្យហូរចូលទៅក្នុងប្រឡាយទឹក។ លុះពេលបង្ហូរនោះ ទឹកក៏បានហូរចូលដីស្រែបុរសម្នាក់ទៀត ឈ្មោះ ប៉ែន នីម៉េ អាយុ៥៩ឆ្នាំ ដែលគាត់ទប់ដីមិនឲ្យទឹកហូរចេញពីស្រែរបស់គាត់។
ភ្លាមនោះបុរសឈ្មោះ ប៉ែន នីម៉េ បានខឹងសម្បានឹងឈ្មោះ លឹម ឡាំ ដែលធ្វើឲ្យទឹកហូរពេញដីស្រែរបស់គាត់។ ពេលនោះក៏មានការប្រើប្រាស់ពាក្យសម្តី រហូតឈានដល់ប្រើអំពើ ហិង្សាដាក់គ្នាទៅវិញទៅមកប៉ុន្តែដោយ ឈ្មោះ ប៉ែន នីម៉េ មានគ្នា២នាក់ប្រពន្ធ ទើបធ្វើឲ្យឈ្មោះ លឹម ឡាំ មិនអាចតតាំងឈ្នះនោះឡើយ ដោយឈ្មោះ ប៉ែន នីម៉េ ចាប់ឈ្មោះ លឹម ឡាំ ចងដៃ ចងជើង ជ្រមុជទឹកស្រែតែម្តង។
ក្រោយមកទើបមានប្រជាពលរដ្ឋទៅឃើញហើយបាន ឃាត់ភាគីទាំងសងខាង និងរាយការណ៍ ជូនមន្ត្រីនគរបាលមូលដ្ឋាន។
ពាក់ព័ន្ធករណីនេះលោកឧត្តមសេនីយ៍ត្រី ហេង វុទ្ធី ស្នងការរងទទួលផែនព្រហ្មទណ្ឌនៃស្នងការដ្ឋាននគរបាល ខេត្តកំពង់ចាមបានអះអាងថា ពិតជាមានករណីប្រើប្រាស់ អំពើហិង្សាដាក់គ្នាទៅវិញទៅមកប្រាកដមែន នៅចំណុច វាលស្រែ ។ លោកបន្ថែមទៀតថា ករណីនេះលោកកំពុងដំណើរការសំណុំរឿងទៅតាមនីតិវិធីដោយបញ្ជូនទៅសាលា ដំបូងខេត្តកំពង់ចាម។
យ៉ាងណាក៏ដោយសាច់ញាតិជនរងគ្រោះ នៅតែទទូចសុំឲ្យសមត្ថកិច្ច និងតុលាការខេត្តកំពង់ចាម ចាត់វិធានការភាគីជនបង្ក ដោយសារប្រើអំពើហិង្សាយ៉ាងធ្ងន់ដែលត្រូវទទួលទោសតាមច្បាប់៕
