ភ្នំពេញ ៖ មន្ត្រីនគរបាលក្រសួងមហាផ្ទៃបានប្រាប់ថា ប្រតិបត្តិការបង្ក្រាបគ្រឿងញៀនចំនួនពីរទីតាំង ក្នុងខណ្ឌបឹងកេងកង និង ខណ្ឌច្បារអំពៅ ក្នុងរាជធានីភ្នំពេញ រយៈពេល២ថ្ងៃ ចាប់ពីថ្ងៃទី០៣ ដល់ថ្ងៃទី០៤ ខែធ្នូ ឆ្នាំ២០១៩នេះកន្លងទៅថ្មីៗនេះ សមត្ថកិច្ចបានរកឃើញថ្នាំញៀនប្រមាណជិត១០០គីឡូក្រាម និងសារធាតុគីមី សម្រាប់ផ្សំ ប្រមាណជាង២៨គីឡូក្រាម ។
មន្ត្រីបញ្ជាក់ថា ប្រតិបត្តិការធ្វើឡើងចំនួនពីរទីតាំង ទី១-ធ្វើឡើងកាលពីថ្ងៃទី០៣ ខែធ្នូ ឆ្នាំ ២០១៩ វេលាម៉ោង២៣៖៥០នាទី នៅចំណុចផ្ទះជួលគ្មានលេខ ផ្លូវលេខ១១៣ ក្រុម២៣ ភូមិ០៣ សង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ ។ ឃាត់ខ្លួន ជនជាតិវៀតណាមចំនួន០៤នាក់ រួមជាមួយថ្នាំញៀនចំនួនប្រហែល១០គីឡូក្រាម និងទី២-ធ្វើនៅព្រឹកថ្ងៃទី៤ ខែវិច្ឆិកា ឆ្នាំ២០១៩ នៅចំណុចព្រំប្រទល់ រវាងសង្កាត់ព្រែកថ្មីនិងសង្កាត់ព្រែកឯង ផ្ទះលេខ៤៧ ផ្លូវលេខ១១២ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។ ដកហូតបាន ៖ ម្សៅក្រាមពណ៌សថ្លាចំនួន០១កញ្ចប់, ក្រាមពណ៌ត្នោត ២០កញ្ចប់, សារធាតុរាវ៣៨ដប, សារធាតុរាវពណ៌ខ្មៅ២៤ចានជ័រធំ (ក្លាសេក្នុងទូរទឹកកក០២), ឧបករណ៍ផលិតកែច្នៃមួយចំនួនសារធាតុរាវពណ៌ស ១ប៊ីដុង ។
សរុបប្រមូលវត្ថុតាងទាំងពីរទីតាំង ៖ មេតំហ្វេតាមីន (ICE) ៩៩២៧.៣២ក្រាម, អិចស្តាស៊ី (MDMA) ទម្ងន់៧៤៧៦៩.២៥ក្រាម (សរុបសារធាតុញៀនជាង៨៤គីឡូក្រាម) និងសារធាតុគីមីផ្សំជាង២៨គីឡូក្រាម ។ បន្ទាប់ពីនគរបាលនាំជនសង្ស័យចុះឆែកឆេរទីតាំងកែច្នៃគ្រឿងញៀន នៅទីតាំងខាងលើរួចមកនគរបាលបាននាំជនសង្ស័យ និងវត្ថុតាងមកមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី ៕ ដោយ ៖ ជាយក្រុង
