ខេត្តបាត់ដំបង៖ ខេត្តបាត់ដំបងបានរងអំពើប្លន់ថ្មីមួយករណីទៀតហើយ ផ្ទះគ្រូទាយដ៏ល្បីល្បាញប្រចាំស្រុកវេលត្រូវបានចោរប្លន់ប្រដាប់អាវុធវែងខ្លី៣ដើមមានគ្នា៣នាក់បិទមុខទាំងអស់បានយកដែកស្បែងគាស់ចំរឹងបង្អួចផ្ទះបាយខាងក្រោយផ្ទះហើយចូលវាយបុរសម្ចាស់ផ្ទះម្នាក់បណ្តាលឱ្យរងរបួសធ្ងន់ និងចាប់ចងម្ចាស់ផ្ទះពីរនាក់ប្តីប្រពន្ធប្លន់យកទ្រព្យសម្បត្តិមួយចំនួនធំបានសម្រេចយ៉ាងស្ងៀមស្ងាត់ហើយរត់គេចខ្លួនបាត់ ។
ហេតុការណ៍នេះកើតឡើងកាលពីវេលាម៉ោង១រំលងអធ្រាត្រថ្ងៃទី៤ ខែមករា ឆ្នាំ២០១៥ នៅចំណុចភូមិរូងអំពិល ឃុំខ្នាចរមាស ស្រុកបវេល ខេត្តបាត់ដំបង ។ បើតាមសេចក្តីរាយការណ៍ពីសមត្ថកិច្ចឱ្យដឹងថា ម្ចាស់ផ្ទះរងគ្រោះប្តីឈ្មោះសិលា សៅកង អាយុ៦១ឆ្នាំ ប្រពន្ធឈ្មោះហេង ណាគី អាយុ៦០ឆ្នាំ ។
មុនពេលកើតហេតុម្ចាស់ផ្ទះកំពុងដេកលង់លក់ទាំងពីរនាក់ប្តីប្រពន្ធមិនដឹងក្រុមចោរប្លន់គាស់ចំរឹងបង្អួចផ្ទះចូលពីពេលណានោះទេ លុះបន្ទាប់មកពួកវាចូលបើកភ្លើងក្នុងផ្ទះយកកាំភ្លើងភ្ជង់ពួកគាត់ហើយយកខ្សែលួសចាប់ចងស្លាបសេកទាំង២នាក់ប្តីប្រពន្ធ។ ចោរប្លន់ក៏បានវាយម្ចាស់ផ្ទះជាប្តីនិងដែកត្បែងបេកក្បាលហូរឈាមរងបួសយ៉ាងធ្ងន់នៅពេលនោះស្ត្រីជាប្រពន្ធក៏បានអង្វរចោរប្លន់នោះកុំវាយប្តីគាត់ទៀតអីចង់បានអីក៏យកទៅចុះ។ ស្រ្តីម្ចាស់ផ្ទះបានយកកូនសោទូឱ្យក្រុមចោរនោះចាក់សោទូប្រមូលយកមាសប្រាក់នៅក្នុងទូទាំងអស់ ហើយពួកវាក៏នាំគ្នារត់គេចខ្លួនចេញទៅបាត់។ ក្រោយពីក្រុមចោរប្លន់ចេញទៅបាត់ហើយនោះម្ចាស់ផ្ទះពីរនាក់ប្តីប្រពន្ធមិនហ៊ានស្រែកឱ្យគេជួយនោះទេ លុះភ្លឺឡើងមានអ្នកភូមិទៅរកឱ្យម្ចាស់ផ្ទះទាយហើយឃើញជាប់ចំណងក៏នាំគ្នាស្រាយចំណងតាំងពីរនាក់ប្តីប្រពន្ធទើបមានការភ្ញាក់ផ្អើល ហើយក៏បានដឹកបុរសជាប្តីរងរបួសបញ្ជូនទៅកាន់មន្ទីរពេទ្យ ។
បើតាមប្រភពព័ត៌មានឱ្យដឹងទៀតថា ក្រុមចោរប្លន់បានដាក់ជណ្តើរឡើងរបងផ្ទះជនរងគ្រោះជាង២ម៉ែត្រចូលគាស់ចំរឹងបង្អួចធ្វើសកម្មភាពប្លន់ជិត១ម៉ោងចូលរើកកូរកកាយអីវ៉ាន់ពេញក្នុងផ្ទះដោយមិនរំខាន់ដល់សមត្ថកិច្ច និងអ្នកជិតខាងឡើយ។ ទ្រព្យសម្បត្តិដែលរងការបាត់បង់រួមមាន គ្រឿងពេជ្រសរុបជាង២ម៉ឺនដូល្លា ផ្លាទីនសរុប៥ដំឡឹង ខ្សែកខ្សែដៃមាស សរុប៦ម្លឹង១ជី មាសសន្លឹក៦តម្លឹង ប្រាក់អាមេរិច១៧០០ដូល្លា ប្រាក់ខ្មែរ ៩លានរៀល ប្រាក់ថៃ១ម៉ឺន២ពាន់បាត ។
ជុំវិញបញ្ហាខាងលើប្លន់សមត្ថកិច្ចទាំងពីរប្រភេទខេត្តនិងស្រុក កំពុងតែស្រាវជ្រាវស៊ើបអង្កេតដោយមិនទាន់កំណត់បានមុខសញ្ញាក្រុមចោរប្លន់នៅឡើយនោះទេមកដល់រសៀលថ្ងៃដដែលនេះក៏ប៉ុន្តែសមត្ថកិច្ចកំពុងតែដុតដៃដុតជើង ដើម្បីឈានដល់កំណត់បានមុខសញ្ញាចាប់យកមផ្តន្ទាទោសតាមផ្លូវច្បាប់ ៕
ដោយ៖ សំ វិច្ឆិកា
