ខេត្ដកំពង់ស្ពឺ៖ បន្ទាប់ពីមានករណីប្លន់ថៅកែទិញស្រូវនិងចងការប្រាក់កាល ពីអំឡុងប៉ុន្មានថ្ងៃមុននៅស្រុកឧដុង្គសមត្ថកិច្ចនគរបាលខេត្ដបានបើកប្រតិបត្ដិការស្វែងរកក្រុមជនដៃដល់រហូតឃាត់ខ្លួន បាន២នាក់នៅយប់ថ្ងៃទី៨ ខែមករា ឆ្នាំ ២០១៥ នៅចំណុចភូមិព្រៃគុយ ឃុំ ត្រញំងគង ស្រុកសំរោងទង ខេត្ដកំពង់ស្ពឺ។
ជនសង្ស័យត្រូវឃាត់ខ្លួនឈ្មោះ សឿន ស៊ី ភេទប្រុស អាយុ៣០ឆ្នាំ រស់នៅភូមិ ត្រញំងវែង ឃុំដំណាក់រាំង ស្រុកឧដុង្គ ខេត្ដកំពង់ស្ពឺ និងឈ្មោះ ស៊ីម សេម ភេទ ប្រុស អាយុ៣២ឆ្នាំ រស់នៅភូមិខ្សាច់ពូន ឃុំ-ស្រុកជាមួយគ្នា។
មន្ដ្រីនគរបាលព្រហ្មទណ្ឌបានឱ្យដឹង ថា នៅព្រឹកថ្ងៃទី៩ ខែមករា ឆ្នាំ២០១៦ សមត្ថកិច្ចបាននាំខ្លួនជនសង្ស័យទៅរក កន្លែងលាក់ទុកអាវុធនៅម្ដុំត្រញំងវែង ឃុំដំណាក់រាំង ស្រុកឧដុង្គ ដែលជាកន្លែង ក្រុមជនសង្ស័យធ្វើសកម្មភាពរួចយក អាវុធទៅលាក់ទុកក្នុងព្រៃក្បែរភូមិដែល ពួកគេធ្វើសកម្មភាពចាប់ស្ដ្រីរងគ្រោះ ប្លន់និងជំរិតយកប្រាក់ ។
លោកឧត្ដមសេនីយ៍ត្រី សោម បូរ៉ា ស្នងការរងនគរបាលខេត្ដទទួលបន្ទុក ព្រហ្មទណ្ឌបានឱ្យដឹងថា បន្ទាប់ពីឃាត់ ខ្លួនបានក្រុមជនសង្ស័យនេះរួចមកសមត្ថកិច្ចរបស់លោកបាននាំជនទាំង២នាក់ទៅចង្អុលបង្ហាញកន្លែងលាក់ទុកអាវុធដោយរកឃើញអាវុធខ្លីម៉ាកកា៥៤មួយដើម ទៀតព្រមទាំងវត្ថុតាងមួយចំនួនពាក់ព័ន្ធ ក្នុងការធ្វើសកម្មភាព។ដោយឡែកទ្រព្យសម្បត្ដិរបស់ស្ដ្រីរងគ្រោះមានដូចជាខ្សែដៃខ្សែកនិងចិញ្ចៀនប្រមាណជិត២តម្លឹងដែលក្រុមជនសង្ស័យដោះយកពីស្ដ្រីរង គ្រោះពួកគេសារភាពថាបានយកទៅ លក់ឱ្យអ្នកទិញលក់មាសនៅផ្សារបាត់ ដឹងអស់ហើយ។ នៅថ្ងៃដដែលសមត្ថ កិច្ចនគរបាលខេត្ដបានឱ្យជនសង្ស័យទាំង២នាក់នាំទៅកាន់កន្លែងដែលពួកគេយកគ្រឿងអលង្ការទៅលក់ហើយអ្នកទិញបាន ប្រាប់ថាខ្សែកខ្សែដៃនិងចិញ្ចៀននោះគេ បានរំលាយវាចូលគ្នាអស់ហើយតែយ៉ាងណាសមត្ថកិច្ចឱ្យអ្នកទិញទទួលស្គាល់ថាពិតជាបានទិញគ្រឿងអលង្ការនេះពីក្រុម ជនសង្ស័យពិតមែន ។
បច្ចុប្បន្នជនសង្ស័យទាំង២នាក់ត្រូវ បានឃុំខ្លួននៅអធិការដ្ឋាននគរបាលស្រុកឧដុង្គដើម្បីកសាងសំណុំរឿងបញ្ជូនបន្ដ មកស្នងការដ្ឋាននគរបាលខេត្ដចាត់ការបន្ដ។
គួររំលឹកថាកាលពីថ្ងៃទី៣១ ខែធ្នូ ឆ្នាំ២០១៥ នៅចំណុចព្រៃក្បែរភូមិ ត្រញំងវែង ឃុំដំណាក់រាំង ស្រុកឧដុង្គ មានករណីស្ទាក់ប្លន់និងចាប់ជំរិតយក លុយ២០.០០០ដុល្លារពីថៅកែទិញស្រូវនិងចងការប្រាក់ម្នាក់។ ក្នុងនោះក្រុម ជនសង្ស័យបានដោះយកគ្រឿងអលង្ការពី ស្ដ្រីរងគ្រោះមានដូចជាខ្សែដៃ២ខ្សែទម្ងន់ ១តម្លឹងកន្លះនិងខ្សែកមួយខ្សែព្រមទាំង ចិញ្ចៀនមួយវង់ ។
ក្រោយកើតហេតុសមត្ថកិច្ចរកឃើញអាវុធមួយដើមម៉ាកកា៥៩ដែលក្រុម ជនសង្ស័យលាក់ទុកនៅក្នុងព្រៃ ៕
ដោយ៖ សេនាស័ក្ដិ
