ភ្នំពេញ៖ ដើម្បីប្តូរយកមកវិញនូវសុខមាលភាពសង្គមរបស់ប្រជាជន ក្នុងដំណាក់កាលនៃការរីករាលជំងឺផ្លូវដង្ហើម Covid-19 នាយករដ្ឋមន្ត្រីវៀតណាម បានក្រើនរម្លឹកដល់ឲ្យមន្ត្រីតាមតំបន់ ឲ្យយកចិត្តទុកដាក់ខ្ពស់ចំពោះជនងាយរងគ្រោះ និងប្រជាជនក្រីក្រ និងបង្ហាញពីការប្តេជ្ញាចិត្តក្នុងការលះបង់កំណើនសេដ្ឋកិច្ចក្នុងរយៈពេលខ្លី ។
តាមរយៈកិច្ចប្រជុំគណៈរដ្ឋមន្ត្រីថ្ងៃ៣ មេសា លោកនាយករដ្ឋមន្ត្រីវៀតណាម Nguyen Xuan Phuc បានលើកឡើងថា ដល់ពេលហើយ ដែលរដ្ឋាភិបាលវៀតណាម ត្រូវប្រើប្រាស់គ្រប់មធ្យោបាយដើម្បីទប់ស្កាត់ និងគ្រប់គ្រងឲ្យបានលើការរាតត្បាតរបស់វីរុស Covid-19។ លោកទទូចឲ្យមន្ត្រីតាមតំបន់ និងភាគីពាក់ព័ន្ធ អនុវត្តវិធានការទប់ស្កាត់ឲ្យបានទាន់ពេល និងឆាប់រហ័ស។
យោងតាមការចុះផ្សាយរបស់ភ្នាក់ងារព័ត៌មាន Vietnam News លោកនាយករដ្ឋមន្ត្រី បានទទួលស្គាល់ថា ប្រជាជន និងមន្ត្រីតាមតំបន់មួយចំនួន ហាក់នៅមានការយល់ច្រលំលើវិធានការនៅឆ្ងាយពីគ្នា ក៏ប៉ុន្តែរដ្ឋាភិបាល ក៏មានផែនការលម្អិតដើម្បីផ្តល់ភាពងាយស្រួលដល់មន្ត្រី និងប្រជាជនអនុវត្តឲ្យបានត្រឹមត្រូវផងដែរ។
គួរកត់សម្គាល់នោះ ដើម្បីជាការឆ្លើយតបនឹងវិបត្តិនេះ គណៈរដ្ឋមន្ត្រីវៀតណាម បានត្រៀមចេញសេចក្តីសម្រេចមួយស្តីពីសុខភាពសង្គម ដែលនឹងត្រូវដាក់ឲ្យអនុវត្តនាពេលមុខសម្រាប់គាំពារប្រជាជន ដែលរងផលប៉ះពាល់ខ្លាំងនៃវីរុសរាតត្បាត Covid-19 រាប់បញ្ចូលទាំងកម្មករ ប្រជាជនក្រីក្រ ក៏ដូចជាប្រជាជនដែលងាយរងគ្រោះផងដែរ។
ជាពិសេសនោះ នាវេទិកាដដែលនោះ លោកនាយករដ្ឋមន្ត្រី បានដាក់បញ្ជាឲ្យមន្ត្រីថ្នាក់តំបន់ យកចិត្តទុកដាក់ខ្ពស់លើប្រជាជនក្រីក្រ និងធានាពីតម្រូវការចាំបាច់មូលដ្ឋានរបស់ពួកគេ ដូចជា អគ្គិសនី ទឹក ចំណីអាហារ និងថ្នាំប្រើប្រាស់ជាដើម។
គួរជម្រាបថា វៀតណាម ក៏ជាប្រទេសក្នុងតំបន់មួយ ដែលមានចំនួនអ្នកឆ្លងវីរុស Covid-19 ច្រើនករណីផងដែរ ។ គិតត្រឹមថ្ងៃ៤ មេសា វៀតណាម មានអ្នកឆ្លងសរុប ២៤០ ករណី ដោយជាសះស្បើយ ៩០ ករណី ខណៈករណីអ្នកស្លាប់ មិនទាន់មាននៅឡើយនោះទេ៕
