ភ្នំពេញ ៖នារីវ័យក្មេងម្នាក់សម្រេចចិត្តបញ្ចប់ជីវិត្តខ្លួនឯងដោយលេបថ្នាំសម្លាប់ខ្លួន សង្ស័យមានវិបត្តិស្នេហា ឈ្លោះគ្នាជាញឹកញ៉ាប់ ជាមួយគូរស្នេហ៍ បង្កឲ្យភ្ញាក់ផ្អើល សមត្ថកិច្ចចុះទៅពិនិត្យ កាលពីវេលាម៉ោង១២និង៣០នាទីរសៀល ថ្ងៃទី២១ ខែមេសា ឆ្នាំ២០២០ នៅផ្ទះលេខ៥៣ ផ្លូវលំ បុរីរ៉ុងរឿង ភូមិទួលពង្រ សង្កាត់ចោមចៅ១ ខណ្ឌពោធិសែនជ័យ ។
នារីរងគ្រោះឈ្មោះ តាំង ម៉េងលី អាយុ២០ឆ្នាំ មុខរបរ កម្មការនីរោងចក្រ មានទីលំនៅ ផ្ទះកើតហេតុខាងលើ រួមជាមួយក្រុមគ្រួសារ មានស្រុកកំណើត ស្រុកស្ទោង ខេត្តកំពង់ធំ ។
តាមប្រភពពីប្រជាពលរដ្ឋនៅកន្លែងកើតហេតុ បានឲ្យដឹងថា ករណីខាងលើ នារីរងគ្រោះបានប្រើប្រាស់ថ្នាំលេបជាច្រើនគ្រាប់ ប៉ុនប៉ងបញ្ចប់ជីវិតរបស់ខ្លួន កាលពីវេលាម៉ោង១១និង៣០នាទីព្រឹកថ្ងៃទី២១ ខែមេសា មកម្លេះ តែក្រុមគ្រួសារទម្រាំដឹង អស់រយៈពេល១ម៉ោងទៅហើយ ធ្វើឲ្យនារីខាងលើប្រតិកម្មថ្នាំ រហូតដល់ស្លាប់បាត់ជីវិត ទោះជាក្រុមគ្រួសារ រកតែជួយមិនទាន់ផង បង្កឲ្យផ្អើលឆោឡោ រាយការណ៍ទៅអាជ្ញាធរ សមត្ថកិច្ច ចុះពិនិត្យជាក់ស្តែង ។
តាមប្រភពមួយផ្សេងទៀតបានឲ្យដឹងថា នារីរងគ្រោះកើតមានជម្លោះជាមួយមិត្តប្រុសញឹកញ៉ាប់ រហូតមកដល់រសៀលថ្ងៃនេះ ក៏សម្រេចចិត្តបែបនេះតែម្តង ។
សាកសពក្រោយពីសមត្ថកិច្ចជំនាញពិនិត្យកោសល្យវិច័យ ឃើញថាស្លាប់ដោយធ្វើអត្តឃាត សម្លាប់ខ្លួនដោយខ្លួនឯង រួចប្រគល់ជូនក្រុមគ្រួសារចាត់ចែងរៀបចំធ្វើបុណ្យតាមប្រពៃណី ៕ដោយ៖សុខាសែនជ័យ
