តាមមជ្ឈមណ្ឌុលគ្រប់គ្រងជំងឺឆ្លងអាមេរិក CDC បានព្យាករណ៍ថា នៅថ្ងៃទី១ខែមិថុនា អាមេរិក នឹងមានអ្នកស្លាប់ដល់ទៅជាង១០ម៉ឺននាក់។

ជាមួយគ្នានេះដែរនៅលើពិភពលោកវិញ ក្នុងរយៈពេល២៤ម៉ោងកន្លងមក ពិភពលោក មានអ្នកឆ្លងថ្មីដល់ទៅ ៩៥ ៩៩៤នាក់ និងមានអ្នកស្លាប់ ដល់ទៅ ៤៩៣៥ នាក់។ បណ្តាប្រទេសតំបន់អឺរ៉ុបកំពុងតែខិតខំបន្ធូរបន្ថយច្បាប់បម្រាមគោចរ ដើម្បីដំណើរការសេដ្ឋកិច្ចឡើងវិញ ។

តាមគេហទំព័រ Worldometers.info គិតដល់ព្រឹកថ្ងៃទី១៦ខែឧសភា ត្រឹមម៉ោង១០ព្រឹក នៅទូទាំងពិភពលោក មានអ្នកឆ្លង សរុបដល់ទៅ ៤ ៦២៨ ៥៤៩ នាក់ ក្នុងនោះមានអ្នកស្លាប់ កើនឡើងដល់ទៅ ៣០៨ ៦៤៥ នាក់។ ចំណែកអ្នកឆ្លងដែលបានព្យាបាលជាសះស្បើយមានដល់ទៅ ១ ៧៥៨ ០៣៩នាក់។
អាមេរិក នៅតែជាប្រទេសដែលមានអ្នកឆ្លង និងស្លាប់ ច្រើនជាងគេបង្អស់នៅលើពិភពលោកដដែល។ បច្ចុប្បន្នអាមេរិកមានអ្នកឆ្លង ១ ៤៨៤ ២៨៥ នាក់ និងស្លាប់ ៨៨ ៥០៧ នាក់ (ស្លាប់ថ្មីបន្ថែម១ ៤៨៨នាក់ និងឆ្លងថ្មី២៤ ២៩៤ នាក់ ក្នុងរយៈពេល២៤ម៉ោង)។
លំដាប់ទីពីរ គឺប្រទេសអេស្ប៉ាញ ដោយមានអ្នកឆ្លងសរុប ២៧៤ ៣៦៧ នាក់ ស្លាប់ ២៧ ៤៥៩នាក់ ។ លំដាប់ទី៣គឺរុស្ស៊ី មានអ្នកឆ្លង ២៦២ ៨៤៣ នាក់ និងស្លាប់ ២ ៤១៨នាក់។ បន្ទាប់មកគឺប្រទេសអង់គ្លេស និងអ៊ីតាលី នៅតែមានអ្នកឆ្លងនិងស្លាប់កើនឡើងជាបន្តបន្ទាប់ បើទោះបីមានចំនួនអ្នកស្លាប់ និងឆ្លងថយចុះតិចជាងមុន គិតក្នុងមួយថ្ងៃៗ៕