ខេត្តស្វាយរៀង៖បុរសម្នាក់បែកក្បាលហូរឈាមស្លាប់នឹងកន្លែងនិងម្នាក់ទៀតរងរបួសធ្ងន់ដោយសារគ្រោះថ្នាក់ចរាចរណ៍រវាងគោយន្តបើកមិនប្រកាន់ស្ដាំបុកអ្នកជិះម៉ូតូបញ្រាស់គ្នាយ៉ាងពេញទំហឹងលាន់សូរដូចរន្ទះបង្កការភ្ញាក់ដល់អ្នកភូមិទាំងព្រឹក។
ហេតុការណ៍នេះបានកើតឡើងកាលពីវេលាម៉ោង៨និង៨នាទីព្រឹក ថ្ងៃទី១៩ ខែមិថុនាឆ្នាំ២០២០ លើផ្លូវលេខ ៣១៥ ស្ថិតក្នុងភូមិ អណ្ដូងតាសី សង្កាត់ ព្រៃឆ្លាក់ ក្រុង ស្វាយរៀង ។
បើតាមសមត្ថកិច្ចនគរបាលក្រុងស្វាយរៀងបានឲ្យដឹងថាបុរសដែលស្លាប់មានឈ្មោះមាស យ៉ា អាយុ ៥៨ រស់នៅភូមិ ពោធិ៍រាជ ឃុំ ពោធិ៍រាជ ស្រុក ស្វាយជ្រំ ខេត្ត ស្វាយរៀង
និង អ្នករួមដំណើរឈ្មោះ សុខ សុីថា ភេទ ប្រុស អាយុ ៤៩ មុខរបរ កសិករ រស់នៅភូមិឃុំជាមួយគ្នា ។
ចំណែកអ្នកបើកគោយន្តបង្កហេតុត្រូវបានស្គាល់ឈ្មោះសុខ មករា អាយុ ២៥ ឆ្នាំ មុខរបរ បើកគោយន្ដដឹកដី រស់នៅភូមិ មេលោង សង្កាត់ ចេក ស្វាយរៀង ខេត្ត ស្វាយរៀង ត្រូវបានសមត្ថកិច្ចឃាត់ខ្លួនមកសាកសួរផងដែរ។
តាមសាក្សីបានឲ្យដឹងថាមុនកើតហេតុមានបុរស២នាក់បានជិះម៉ូតូមួយគ្រឿងម៉ាកហុងដាសេ១២៥ ពណ៌ ខ្មៅ ពាក់ស្លាកលេខ ស្វាយរៀង ១C ៦៥៣១ ក្នុងទិសដៅពីត្បូងមកជើង លើផ្លូវលេខ ៣១៥ខណះនោះស្រាប់តែមានអ្នកបើកគោយន្តមិនប្រកាន់ស្ដាំបញ្ច្រាស់គ្នាបុកពេញទំហឹងបង្កការភ្ញាក់ផ្អើលតែម្ដង។
ក្រោយមកអ្នករងរបួសធ្ងន់ត្រូវបានដឹកមកសង្គ្រោះនៅមន្ទីពេទ្យបង្អែកខេត្តចំណែកមធ្យោបាយធ្វើដំណើរទាំង២គ្រឿងសមត្ថកិច្ចវាស់វែងនិងរក្សាទុកនៅអធិការក្រុងស្វាយរៀង ។
រីឯអ្នកស្លាប់សមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ចំពោះអ្នកបើកបរគោយន្ដកែច្នៃឃាត់ខ្លួននៅអធិការក្រុងស្វាយរៀង រៀបចំសំណុំរឿងចាត់ការបន្ដតាមច្បាប់ ៕ យឹម សុថាន
