ខេត្តក្រចេះ÷ កម្លាំងអធិការដ្ឋាននគរបាលក្រុងក្រចេះ ក្រោមបញ្ជាលោក ឧត្ដមសេនីយ៍ទោ លន់ សុផាត ស្នងការនគរបាលខេត្ត នៅថ្ងៃទី២១ ខែមិថុនា ឆ្នាំ២០២០ នេះបានចុះបង្រ្កាបទីតាំងជល់មាន់មួយកន្លែងដកហូតបានវត្ថុតាងជាច្រើន នៅចំនុចក្នុងព្រៃខាងក្រោយសាលារៀនកាប៉ូ ប្រហែល៥០០ម៉ែត្រ ស្ដិតនៅភូមិកាប៉ូ សង្កាត់អូរឬស្សី ក្រុងក្រចេះ។

មន្ត្រីនគរបាលក្រុងក្រចេះបញ្ជាក់ឲ្យដឹងថា ប្រតិបត្ត័ការបង្រ្កាបទីតាំងជល់មាន់នេះ កម្លាំងនគរបាលដកហូតវត្ថុតាងរួមមាន÷ មាន់ជល់ចំនួន៣ក្បាល, កន្រ្ទក់ដាក់ចំនួន៥ ,អង្រុតក្រុងមាន់ចំនួន៣,ជញ្ជីងចំនួន១គ្រឿង,ស្កត់រំជើងមាន់ចំនួន៤ដុំ,កៅអីចំនួន៣, ម៉ូតូចំនួន១៧គ្រឿង។

មន្ត្រីនគរបាលបញ្ជាក់ទៀតថា ការចុះបង្រ្កាបនេះមិនបានឃាត់ខ្លួន អ្នកល្បែងជល់មាន់ទាំងនោះទេ ព្រោះពេលសមត្ថកិច្ចចុះទៅដល់ ពួកគេបានរត់គេចខ្លួនបាត់អស់ ។
បច្ចប្បន្ន វត្ថុតាងទាំងអស់ត្រូវកម្លាំងនគរបាលនាំយកមករក្សាទុកជាបណ្ដោះអាសន្ន នៅអធិការដ្ឋាននគរបាលក្រុងក្រចេះ៕