ភ្នំពេញ៖ ភាពយន្តអប់រំខ្លី រឿង “បងប្អូនខ្លះ” បានធ្វើឲ្យអ្នកទស្សនាពេញចិត្តខ្លាំង។ ពេញចិត្តព្រោះតែភាពយន្តនេះបានបង្កប់ដោយអត្ថន័យអប់រំស៊ីជម្រៅចាក់ចំបេះដូងអ្នកទស្សនា ពិសេសរៀបរាប់អំពីរឿងរ៉ាវបងប្អូនដែលមិនចេះស្រលាញ់គ្នា។
ជាស្នាដៃផលិតភាពយន្តទី៦របស់ លោក សយ រតនា គឺរឿង “បងប្អូនខ្លះ” នោះលេចចេញការគាំទ្រខ្លាំងស្របពេលដែលទើបចេញផ្សាយបានបីថ្ងៃប៉ុណ្ណោះអាចរកបានអ្នកចូលទស្សនាបានរហូតដល់ជាង៣លានដងហើយ។ ផលិតករភាពយន្តខ្លីនេះបានបញ្ជាក់ថា “រឿងនេះហាក់បីចាដុតឈឺៗណាស់សម្រាប់បងប្អូនខ្លះដែលមិនចេះស្រឡាញ់គ្នា ទុកបងប្អូនឯងដូចសម្រាម ពេលបងប្អូនមានច្រណែន ពេលបងប្អូនក្រ ជាន់ថែម”។ អ្វីដែលគេចាប់អារម្មណ៍ផងដែរនោះក៏មានវត្តមានអ្នកនិពន្ធនិងដឹកនាំសម្ដែងផ្ទាល់ ជាតួបងប្រុសកំណាញ់សក់ក្រញាញ់ដែលធ្វើឲ្យអ្នកទស្សនាស្អប់ និងជេគ្រប់មាត់។ ផលិតករូបនេះលើកឡើងថា នេះជាស្នាដៃភាពយន្តអប់រំថ្មីដែលទទួលបានការគាំទ្រច្រើន ហើយភាពយន្តនេះបានដកស្រង់មកពីជីវិតរបស់ប្រជាជនខ្មែរមួយចំនួនដែលតែងមានជម្លោះក្នុងគ្រួសារ បាត់បង់មនោសញ្ចេតនាព្រោះជិវិតផ្ទាល់ខ្លួន និង បំភ្លេចកាតព្វកិច្ចជាកូនល្អចំពោះអ្នកមានគុណ។ លោករំពឹងថាស្នាដៃភាពយនុ្តអប់រំមួយនេះនឹងអាចរួមចំណែកកែប្រែការគិត ឥរិយាបទក្នុងការរស់នៅប្រចាំថ្ងៃ យល់កាន់តែច្បាស់ពីតម្លៃនៃភាពជាបងប្អូនដែលមិនអាចយកលុយមកទិញបាន។ លោកថាពាក្យថាបងប្អូនគឺជាពាក្យដែលយើងស្តាប់ទៅមានអារម្មណ៍ថាកក់ក្តៅ និងត្រូវតែថែរក្សាជួយគ្នាទៅវិញទៅមក។
គួរបញ្ជាក់ដែរថា ភាពយន្តអប់រំរឿង”បងប្អូនខ្លះ” ត្រូវបានផលិតដោយផលិតកម្ម Job Production និងចូលរួមសម្តែងដោយតារាសម្តែង លោក សយ រតនា កញ្ញា កញ្ញា ជេន ជីរ៉ា កញ្ញា ដាណា លោក យិន ចន្ធី លោក សេន រ៉ាយុទ្ធ កញ្ញា ម៉ាក់តី លោកដាវិនស៊ី និងលោកស្រី ផល្លា៕ ដោយ វឌ្ឍនា
