ភ្នំពេញ៖ ជនសង្ស័យម្នាក់បានធ្វើសកម្មភាពលួចយកម៉ូតូរបស់ប្រជាពលរដ្ឋ រួចជិះរត់គេចខ្លួនយ៉ាងប្រញាប់ប្រញាល់តែជ្រុលចង្កូតទៅបុករថយន្តបណ្ដាលឲ្យដួលត្រូវបងប្អូនប្រជាពលរដ្ឋឃាត់ខ្លួនបានប្រគល់ជូនសមត្ថកិច្ច។
ហេតុការណ៍នេះបង្កឲ្យមានការភ្ញាក់ផ្អើលឡើងនៅវេលាម៉ោង ២ រំលងអធ្រាត្រ ឈានចូលថ្ងៃចន្ទទី១៣ ខែកក្កដា ឆ្នាំ ២០២០ នៅតាមបណ្តោយផ្លូវលេខ១០៨ ក្បែរផ្សាររាត្រី ក្នុងសង្កាត់វត្តភ្នំ ខណ្ឌដូនពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញស្ត្រីម្នាក់បើកម៉ូតូហុងដាស្គូពីពណ៌ស ពាក់ស្លាកលេខភ្នំពេញ1-CX3631 យកសំរាមមកចោលនៅជិតផ្សាររាត្រីហើយអត់បានដកសោចេញពីម៉ូតូ ។ខណៈ
នោះស្រាប់តែមានជនសង្ស័យម្នាក់រត់ទៅឡើងលើម៉ូតូកាច់សោបញ្ឆេះជិះរត់គេចខ្លួនតែបានជ្រុលទៅបុករថយន្តមួយគ្រឿងមិនចាំម៉ាកបណ្ដាលឲ្យដួលត្រូវបានបងប្អូនប្រជាពលរដ្ឋដេញចាប់ឃាត់ខ្លួនជនសង្ស័យបានភ្លាមៗរួចប្រគល់ឲ្យទៅសមត្ថកិច្ច។
បន្ទាប់ពីកើតហេតុសមត្ថកិច្ចបាននាំជនសង្ស័យទៅប៉ុស្តិ៍នគរបាលរដ្ឋបាលសង្កាត់វត្តភ្នំដើម្បីសាកសួរ និងកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី៕ជ្រោយពេជ្រ
