ភ្នំពេញ៖ ការទិញ-លក់ ការដឹកជញ្ជូន និងការប្រមូលផ្កាប្រភេទកេសរកូលព្រៃ (ផ្កាអ័រគីដេ) នៅក្នុងតំបន់ការពារធម្មជាតិត្រូវក្រសួងបរិស្ថានធ្វើការហាមឃាត់។ ក្រសួងបានចាត់ទុកថា សកម្មភាពប្រមូល ឬធ្វើអាជីវកម្មកេសរកូលព្រៃពីតំបន់ការពារធម្មជាតិ គឺជាអំពើខុសច្បាប់ ដែលនឹងត្រូវចាត់វិធានការយ៉ាងម៉ឺងម៉ាត់។ នេះបើតាមសេចក្ដីជូនដំណឹងរបស់ក្រសួងបរិស្ថាន នៅថ្ងៃទី១១ខែកក្កដា។
សេចក្ដីជូនដំណឹងដដែលបញ្ជាក់ថា ជនខិលខូចមួយចំនួនបានបំផុសព័ត៌មាននៅក្នុងបណ្ដាញសង្គមអំពីតម្លៃកេសរកូលព្រៃ ដែលជាកត្តាជំរុញឲ្យមានការប្រមូលកេសរព្រៃនៅក្នុងតំបន់ការពារធម្មជាតិយ៉ាងអនាធិបតេយ្យ។ ការជួញដូរនេះ បណ្ដាលឲ្យប៉ះពាល់ប្រភេទកេសរកូលព្រៃ និងអាចឈានដល់ការផុតពូជទាំងស្រុងនូវប្រភេទកេសរកូលព្រៃមួយចំនួន។
សូមបញ្ជាក់ថា នៅក្នុងមជ្ឈមណ្ឌលស្រាវជ្រាវកេសរកូលសុខអានភ្នំគូលែន មានកេសរកូលជាង១៥០ប្រភេទ និងមានជាង ៣ពាន់ដើម ដោយក្នុងនោះមានកេសរកូល៣ប្រភេទដែលជាប្រភេទបង្កាត់ពូជនាំចូលពីប្រទេសសិង្ហបុរី៕ស សម
