ក្រុមចោរសមុទ្រប្លន់នាវានៅតំបន់អាស៊ី កើនឡើងខ្ពស់ នៅពាក់កណ្តាលឆ្នាំ២០២០នេះ គឺកើនឡើងទ្វេដងបើប្រៀបធៀប ដំណាក់កាលដូចគ្នានៅក្នុងឆ្នាំ ២០១៩។ មូលហេតុនៃការប្លន់កើនឡើងដោយសារតែសេដ្ឋកិច្ចធ្លាក់ចុះបង្កឡើងដោយកូវីដ១៩។
តាមសារព័ត៌មាន BBC បានផ្សាយថា អង្គការសហប្រតិបត្តិការប្រឆាំងចោរសមុទ្រប្រដាប់អាវុធ អាស៊ី(ReCAAP) បានប្រកាសថា ក្នុងរយៈពេល ៦ខែដើមឆ្នាំ២០២០ មានដល់ទៅ៥០ ករណី កើតឡើងនៅតំបន់សមុទ្រក្នុងតំបន់។ តួលេខនេះគឺច្រើនជាងទ្វេដងបើប្រៀបធៀបឆ្នាំ២០១៩ ដែលមានតែ២៥ករណីតែប៉ុណ្ណោះ។
សមុទ្រដែលក្រុមចោរសមុទ្រធ្វើសកម្មភាពប្លន់ច្រើនជាងគេ គឺសមុទ្របង់ក្លាដែស ឥណ្ឌា ហ្វីលីពីន និងឥណ្ឌូនេស៊ី ។ ចំណែកនៅតំបន់សមុទ្រសិង្ហបុរីមានករណីប្លន់នាវាដឹកទំនិញដល់ទៅ១៦លើក ក្នុងរយៈពេល៦ខែដើមឆ្នាំ២០២០។
លោក Brandon Prins អ្នកឯកទេសស្តីពីក្រុមចោរសមុទ្រមកពីTennessee-Knoxville បានឲ្យដឹងថា« ពេលខ្លះក្រុមចោរសមុទ្រ គឺជាពលរដ្ឋនៅក្នុងតំបន់ ពួកគេវាយប្រហារទៅលើនាវាដឹកទំនិញដើម្បីស្វែងរកប្រាក់ចំណូលចិញ្ចឹមជីវិត។ ក្រុមចោរសមុទ្រគឺជាយុវជនវ័យក្មេងគ្មានការងារធ្វើ »។
ក្រុមចោរសមុទ្រតែងតែធ្វើសកម្មភាព ជាក្រុម ដែលមានសមាជិកពី៣ ដល់៨នាក់ ប្រដាប់ដោយអាវុធ។ ក្រុមចោរសមុទ្រចូលទៅគៀកនាវាដឹកទំនិញដោយប្រើ អូប័រ។ ទ្រព្យសម្បត្តិដែលក្រុមចោរសមុទ្រប្លន់ គឺទ្រព្យសម្បត្តិផ្ទាល់ខ្លួន មានតម្លៃ៕
