ខេត្តពោធិ៍សាត់៖ ទណ្ឌិតម្នាក់ត្រូវបានគេប្រទះឃើញយកកន្សែងចងកធ្វើអត្តឃាត ភ្ជាប់នឹងចំរ៉ឹងក្នុងបន្ទប់ទឹក ក្នុងមណ្ឌលកែប្រែអប់រំទី៤ (ម៤) ស្រុកភ្នំក្រវាញ ។
ដែលហេតុការណ៍នេះបានភ្ញាក់ផ្អើលឡើងកាលពីវេលាម៉ោង ៤និង៣០នាទីទៀបភ្លឺ ថ្ងៃទី០១ ខែកុម្ភៈ ឆ្នាំ២០១៦ ត្រង់ចំណុច អគារ B នៃបន្ទប់ B1ក្នុងមណ្ឌលកែប្រែអប់រំទី៤ (ម៤) ស្រុកភ្នំក្រវាញ ស្ថិតក្នុងភូមិព្រហស្ថក្បាល ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ។
ជនរងគ្រោះត្រូវបានគេស្គាល់ឈ្មោះ តូច សុវណ្ណារ៉េត (ហៅ ចិន) ភេទប្រុស អាយុ ២៦ឆ្នាំ រស់នៅរាជធានីភ្នំពេញ ។
តាមការបញ្ជាក់ពីសមត្ថកិច្ចបច្ចេកទេស បានឱ្យដឹងថា ទណ្ឌិតជាជនរងគ្រោះជាប់ពន្ធនាគារពីបទជួញដូរសារធាតុញៀនខុសច្បាប់ ដែលប្រព្រឹត្តឡើងកាលពីថ្ងៃទី០១ ខែឧសភា ឆ្នាំ២០១៤ ប៉ុន្ដែគេដឹងថាទណ្ឌិតរងគ្រោះនៅសល់តែ ១ឆ្នាំ ៤ខែទៀតប៉ុណ្ណោះ ត្រូវបានរួចទោសទណ្ឌ ។ ប្រភពបន្តថា មូលហេតុការចងកធ្វើអត្តឃាតខាងលើត្រូវបានគេសង្ស័យទណ្ឌិតរងគ្រោះរូបនេះ អន់ចិត្តនឹងសាច់ញាតិ ខណៈគ្មានអ្នកមកសួរសុខទុក្ខ ។
ប្រភពខាងលើបន្តទៀតថា ក្រោយពីបច្ចេកទេសពិនិត្យយ៉ាងយកចិត្តទុកដាក់ឃើញថា ជនរងគ្រោះយកកន្សែងពោះគោពណ៌ត្រួយចេក ចងកភ្ជាប់ចំរ៉ឹងដែកក្នុងបន្ទប់ទឹក ហើយមានសភាពរឹងនិងមានស្នាមទ្រុឌត្រង់ក ដូច្នេះសមត្ថកិច្ចសន្និដ្ឋានអាចពិតជាស្លាប់ដោយចងកពិតប្រាកដមែន ៕
ដោយ៖ ប៉ឹម ពិន
