ភ្នំពេញ៖ ក្មេងទំនើង២ក្រុមអំពើហិង្សា វាយគ្នាទៅវិញទៅមកបណ្តាលឲ្យរងរបួសត្រូវបានកម្លាំងនគរបាលប៉ុស្តិ៍ស្រះចកឃាត់ខ្លួន។
ហេតុការណ៍នេះបានកើតឡើងកាលពីម៉ោង០៤នឹង៤០នាទីទាបភ្លឺថ្ងៃទី០៩ ខែសីហា ឆ្នាំ២០២០ នៅចំណុចតំបន់បឹងកក់ថ្មី ក្បែរហាងកាហ្វេអាម៉ាហ្សូន ផ្លូវ១៦៩ ភូមិ៤ សង្កាត់ស្រះចក ខណ្ឌដូនពេញ រាជធានី ភ្នំពេញ។
សមត្ថកិច្ចនគរបាលខណ្ឌដូនពេញបានឲ្យដឹងថា នៅម៉ោងកើតហេតុមានក្រុមក្មេងទំនើង២ក្រុម មួយក្រុមមានគ្នា៤នាក់ និងមួយក្រុមទៀតមានគ្នា៦នាក់ បានចេញពីផឹកស៊ីនៅម្តុំត្រើយម្ខាងជិតសណ្ឋារគារសុខា ខណ្ឌជ្រោយចង្វា លុះជិះម៉ូតូមកដល់ចំណុចកើតហេតុក្មេងទំនើងទាំងពីរក្រុមបា វាយគ្នាទៅវិញទៅមកបណ្តាលអោយមានរបួសស្នាម។ ក្រោយពីទទួលបានព័ត៌មាននេះភ្លាមកម្លាំងប៉ុស្តិ៍នគរបាលនគរបាលស្រះចកបានចុះទៅដល់នឹងឃាត់ខ្លួនបានក្រុមក្មេងទំនើង
០៥នាក់ យកមកស្នាក់ការប៉ុស្តិ៍នគរបាលស្រះចក។
បច្ចុប្បន្នក្មេងទំនើង០៥នាក់ ត្រូវបានសមត្ថកិច្ចកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញដើម្បីអនុវត្តន៍តាមនីតិវិធីបន្ត៕ ដោយ៖ ជ្រោយពេជ្រ
