ខេត្តឧត្តរមានជ័យ ៖ ដោយមើលឃើញផលវិបាកដែលកើតចេញពីការប្រើប្រាស់ប្លាស្ទិក និងពិសេសដើម្បីចូលរួមថែរក្សាបរិស្ថានផងនោះ យុវជនមួយក្រុម នៃវិទ្យាល័យតេជោសែនសំរោង ក្នុងក្រុងសំរោង ខេត្តឧត្តរមានជ័យ បានបង្កើតគំនិតកែច្នៃប្រភេទស្លឹកឈើ ធ្វើជាចានសម្រាប់ដាក់ម្ហូបអាហារប្រចាំថ្ងៃជំនួសចានធ្វើពីប្លាស្ទិកវិញ។ គម្រោងមានឈ្មោះថា «ដើម្បីសហគមន៍ខ្ញុំ» បានលើកចេញជាពាក្យស្លោក«ចូលរួមថែរក្សា ការពារ និងអភិរក្សធនធានធម្មជាតិរបស់យើងទាំងអស់គ្នា» បានលើកទឹកចិត្តឱ្យប្រជាពលរដ្ឋចូលរួមកាត់បន្ថយការប្រើប្រាស់ប្លាស្ទិក ហើយនាំគ្នាងាកមកប្រើប្រាស់ស្លឹកឈើធម្មជាតិ នៃព្រៃសហគមន៍ក្នុងដែនជម្រកសត្វព្រៃសង្ឃរុក្ខាវ័នវិញ។

លោក អោក គិមសួរ ប្រធានក្រុមយុវជនស្ម័គចិត្តដើម្បីសហគមន៍ខ្ញុំ បានឱ្យដឹងថា គម្រោងធ្វើចានដែលផលិតចេញពីស្លឹកឈើ ប្រភទឈើខ្លុង ដែលបច្ចុប្បន្នស្ថិតនៅក្នុងការសិក្សាស្រាវជ្រាវនៅឡើយ។ក្រុមយុវជនកំពុងរៀបចំសាកល្បងនិងបន្តសិក្សារួមគ្នាបន្ថែមទៀត ទាំងការរចនា រូបរាង ទំហំ ចំណុះ ពណ៌ តម្លៃនិងពីគុណភាពរក្សាទុកផងដែរ។
លោក លឿន ឆៃមិញជូ សិស្សវិទ្យាល័យហ៊ុន សែនឧត្តរមានជ័យ បានសំណូមពរដល់ប្រជារដ្ឋក្នុងសហគមន៍ឱ្យចូលរួមកាត់បន្ថយការប្រើប្រាស់ចានស្នោឬចានប្លាស្ទិក និងបានលើកទឹកចិត្តឱ្យប្រជាសហគមន៍ត្រូវរួមគ្នាផលិតចានស្លឹកឈើ ដែលអាចរកចំណូលពីភ្ញៀវទេសចរចូលមកកម្សាន្តថែមទៀត។

ព្រះតេជព្រះគុណ ប៊ុន សាលួត ព្រះប្រធានសង្ឃសហគមន៍ព្រៃសង្ឃរុក្ខាវ័ន បានសាទរចំពោះគម្រោងស្រាវជ្រាវមួយនេះ។ អ្វីដែលរំពឹងទុកនោះ ចានផលិតឡើងពីស្លឹកឈើធម្មជាតិ ដែលទាញយកពីព្រៃសហគមន៍សង្ឃរុក្ខាវ័ន នឹងអាចប្រើជំនួសចានស្នោឬចានប្លាស្ទិកបាននាថ្ងៃខាងមុខ៕

ដោយ៖ សិលា