ក្រសួងសុខាភិបាលអុីតាលី បានប្រកាសឲ្យដឹងថា មានករណីឆ្លងកុវីដ១៩ថ្មីត្រូវបានរកឃើញមានដល់ទៅ ១០៧១ នាក់ ក្នុងរយៈពេល២៤ម៉ោង គឺជាចំនួនយ៉ាងច្រើនបំផុតមិនធ្លាប់មានចាប់តាំងពីខែឧសភា មកទល់ពេលនេះ។ នេះជាលើកទីមួយហើយដែលអុីតាលីមានអ្នកឆ្លងលើសពី១ពាន់នាក់ក្នុងមួយថ្ងៃ។
អុីតាលីគឺជាប្រទេស ដែលរងផលប៉ះពាល់ខ្លាំងជាងគេបំផុតដោយកូវីដ១៩ នៅក្នុងតំបន់អឺរ៉ុប ដោយមានករណីឆ្លង 258,136 នាក់ និងស្លាប់ដល់ទៅ៣៥ពាន់នាក់។ ពេលវេលាដែលឆ្លងរាលដាលនិងស្លាប់ច្រើនជាងគេបំផុត នៅខែមីនា ដល់ខែមេសា ហើយតាំងពីខែឧសភាមក អុីតាលីបានទប់ស្កាត់យ៉ាងល្អ ដោយមិនមានអ្នកឆ្លងលើសពី១ពាន់នាក់ឡើយក្នុងមួយថ្ងៃ។
ចំនួនអ្នកឆ្លងកូវីដ១៩ ខ្ពស់បំផុតដែលអ៊ីតាលីរកឃើញចុងក្រោយ គឺនៅថ្ងៃទី១២ខែឧសភាឆ្នាំ២០២០ នៅពេលនោះមានអ្នកឆ្លង ១៤០២នាក់។ ការរកឃើញមុនពេល ៦ថ្ងៃដែលអុីតាលីអនុញ្ញាតឲ្យ ភោជនីយដ្ឋាន ហាងបារ ក្លឹប បើកទ្វារដំណើរការអាជីវកម្មរបស់ខ្លួនឡើងវិញក្រោយ បិទទ្វារជាង១០សប្តាហ៍។
លោក Francesco Vaia អគ្គនាយកមន្តីរពេទ្យSpallanzani នៅទីក្រុង រ៉ូម ប្រទេសអុីតាលី បានឲ្យដឹងថា ភាគច្រើនអ្នកឆ្លងកូវីដ វិធីសាស្ត្រទប់ស្កាត់កូវីដ១៩រាលដាល គឺ ត្រូវតែត្រួតពិនិត្យ ធ្វើតេស្តនៅតាមមធ្យោបាយធ្វើដំណើរផ្សេងៗ មាន រថភ្លើង នាវា យន្តហោះជាដើម ជាវិធីសាស្ត្រទប់ស្កាត់ការឆ្លងរាលដាល។
ក្រុមអ្នកជំនាញបានលើកឡើងថា មិនថានៅប្រទេសអុីតាលី ឬប្រទេសតំបន់អឺរ៉ុបផ្សេងទៀតនោះឡើយ គឺនៅជុំវិញពិភពលោកទាំងមូលមានករណីឆ្លងកើនឡើងខ្ពស់ដូចគ្នា ដោយសារតែ ប្រទេសជាច្រើនសម្រេចបើកទ្វារជួយដល់សេដ្ឋកិច្ចជាតិដំណើរការឡើងវិញ។ ដោយឡែកនៅតំបន់អឺរ៉ុបមានប្រទេសមួយចំនួនបានអនុញ្ញាតឲ្យអ្នកទេសចរណ៍ក្នុងតំបន់ទៅកម្សន្តក្នុងប្រទេសរបស់ខ្លួន ដោយមិនចាំបាច់ធ្វើចត្តាឡីស័កឡើយ៕ដោយ៖ធីរីណា
