ខេត្តកំពង់ធំ៖ ម្តាយនិងកូនស្រី ធ្លាក់ខ្លួនពិការជេីងដែលត្រូវកាត់ចេញសល់ត្រឹមជង្គង់ ដោយសារគ្រោះថ្នាក់ចរាចរណ៍ រស់នៅខេត្តកំពង់ធំ ទទួលបានការជួយសម្រាលការលំបាក ពីកាកបាទក្រហមកម្ពុជា …!! ។
សូមជម្រាបថា៖ ដោយមេីលឃេីញពីទុក្ខលំបាកវេទនាជាពន់ពេក នៅថ្ងៃសៅរ៍ ទី ២៩ ខែសីហា ឆ្នាំ២០២០នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យ លោកស្រី ម៉ែន នារីសោភ័គ អគ្គលេខាធិការរងទី១ និងសហការី រួមជាមួយសាខាកាកបាទក្រហមកម្ពុជា ខេត្តកំពង់ធំ ចុះសួរសុខទុក្ខ និងនាំយកអំណោយសម្រាលការលំបាករួមមាន ស្បៀង សម្ភារ និងថវិកាចំនួន ១០លានរៀល ផ្តល់ជូនគ្រួសារស្ត្រីឈ្មោះ តឹប ទុំ និងកូនស្រី រស់នៅភូមិសំណាក ឃុំកកោះ ស្រុកសន្ទុក ខេត្តកំពង់ធំ ដែលធ្លាក់ខ្លួនពិការជេីងដែលត្រូវកាត់ចេញសល់ត្រឹមជង្គង់ ដោយសារគ្រោះថ្នាក់ចរាចរណ៍ក្នុងពេលធ្វេីដំណេីរទៅជួយការងារប្តីដែលជាកម្មករដាប់ថ្ម នៅស្រុករវៀង ខេត្តព្រះវិហារ។
ក្នុងឱកាសនោះ លោកស្រី អគ្គលេខាធិការរងទី១ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើក្តីអាណិតអាសូរ និងការសោកស្តាយយ៉ាងក្រៃលែង ចំពោះឧបទ្ទវហេតុគ្រោះថ្នាក់ចរាចរណ៍ដែលបណ្តាលឱ្យមានសោកនាដកម្មដ៏ធ្ងន់ធ្ងរនេះ។ ជាមួយគ្នានេះ លោកស្រី បានផ្តាំផ្ញើ និងលេីកទឹកចិត្តឱ្យថែទាំសុខភាពឱ្យបានល្អ រក្សាអនាម័យក្នុងការរស់នៅ ជាពិសេសត្រូវមានស្មារតីរឹងប៉ុឹង ត្រូវខិតខំតស៊ូទោះជាពិការកាយតែមិនពិការចិត្ត ដេីម្បីជីវិតរស់នៅបន្តទៅមុខទៀត និងដេីម្បីសុភមង្គលក្នុងគ្រួសារ។ ទន្ទឹមនឹងនេះ លោកស្រី ក៏បានអំពាវនាវដល់ប្រជាពលរដ្ឋទាំងអស់ សូមមានស្មារតីប្រុងប្រយ័ត្នជានិច្ចពីជំងឺកូវីដ-១៩ ជាពិសេសត្រូវចូលរួមអនុវត្តច្បាប់ចរាចរណ៍ផ្លូវគោកឱ្យបានខ្ជាប់ខ្ជួន ដេីម្បីសេចក្តីសុខ និងសុភមង្គលក្នុងក្រុមគ្រួសារ។
ក្រុមគ្រួសាររងគ្រោះ បានថ្លែងអំណរគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌ តែងតែគិតគូរពីទុក្ខលំបាករបស់ប្រជាពលរដ្ឋរងគ្រោះទាំងអស់ដោយគ្មានការរើសអើងអ្វីឡើយ៕ដោយ៖ សិលា
