ក្លិបកាំភ្លើងធំ Arsenal បានបញ្ចប់ការចុះហត្ថលេខាទិញបានខ្សែការពារប្រេស៊ីល Gabriel Magalhaes ពីក្លិប Lille ក្នុងតម្លៃ ២៦ លានអឺរ៉ូ (២៣.១៤ លានផោន) ។ កីឡាករវ័យ២២ឆ្នាំដែលជាខ្សែការពារស្លាបឆ្វេងរូបនេះបានបង្ហាញខ្លួន៣៤ លើកនៅក្នុងការប្រកួតទាំងអស់សម្រាប់ក្រុម Lille កាលពីរដូវកាលមុន ខណៈដែលពួកគេបានបញ្ចប់ក្នុងចំណាត់ថ្នាក់លេខ៤នៅលីគកំពូលបារាំង Ligue 1 ។

លោក Edu ប្រធានបច្ចេកទេសរបស់ក្រុម Arsenal បាននិយាយថា “គាត់គឺជាកីឡាករដែលយើងបានសិក្សាអស់មួយរយៈហើយគាត់កំពុងមានតម្រូវការពីក្លិបជាច្រើន។ Gabriel គឺជាកីឡាករដែលមានគុណភាពខ្ពស់ហើយលោក Arteta ជាគ្រូបង្វឹកកំពុងទន្ទឹងរង់ចាំដើម្បីបញ្ចូលគាត់ទៅក្នុងក្លិប” ។

លោក Mikel Arteta គ្រូបង្វឹកក្រុមកាំភ្លើងធំ Arsenal បាននិយាយថា “យើងស្វាគមន៍ Gabriel មក Arsenal ។ គាត់មានគុណសម្បត្តិជាច្រើនដែលនឹងធ្វើឱ្យយើងរឹងមាំក្នុងនាមជាអង្គភាពការពារនិងជាក្រុម។ គាត់បានបង្ហាញភស្តុតាងជាមួយ Lille ថាគាត់គឺជាខ្សែការពារម្នាក់ដែលមានសមត្ថភាពលេចធ្លោជាច្រើនហើយយើងកំពុងរង់ចាំមើលគាត់រីកចម្រើនក្នុងនាមជាកីឡាកររបស់ Arsenal” ។

កីឡាករ Gabriel បាននិយាយថា “ខ្ញុំបានពិចារណាលើការផ្តល់ជូនពីក្លិបមួយចំនួនមុនពេលសម្រេចចិត្តចូលរួមជាមួយ Arsenal ។ វាជាបទពិសោធដ៏អស្ចារ្យមួយដែលមានការផ្តល់ជូនពីក្លិបផ្សេងៗគ្នាមួយចំនួន។ ខ្ញុំបាននិយាយច្រើនជាមួយក្រុមគ្រួសារនិងភ្នាក់ងាររបស់ខ្ញុំ ខ្ញុំក៏បាននិយាយជាមួយនាយកមួយចំនួនរបស់ក្លិប Lille ប៉ុន្តែដូចដែលខ្ញុំបាននិយាយហើយថា ២-៣ឆ្នាំខាងមុខគឺជាការលើកទឹកចិត្តយ៉ាងខ្លាំងសម្រាប់ការសម្រេចចិត្តរបស់ខ្ញុំមកទីនេះ។ ដូច្នេះខ្ញុំនៅទីនេះពាក់អាវក្រុម Arsenal ខ្ញុំនឹងផ្តល់ឱ្យអស់ពីសមត្ថភាពសម្រាប់ក្លិប”។

ដោយឡែកក្លិបSevilla បានចុះហត្ថលេខាជាថ្មីលើខ្សែបម្រើសញ្ជាតិក្រូអាត Ivan Rakitic ពីគូប្រជែង La Liga គឺក្លិប Barcelona ។ Sevillaជាម្ចាស់ជើងឯក Europa League ចុះហត្ថលេខានាំយក Rakitic លើកិច្ចសន្យា៤ឆ្នាំ។

កីឡាករវ័យ ៣២ ឆ្នាំរូបនេះដែលធ្លាប់លេងនៅ Sevilla ចន្លោះពីខែមករាឆ្នាំ២០១១ ដល់ខែមិថុនា ឆ្នាំ២០១៤ មុនពេលចូលរួមជាមួយ Barcelonaបានឈ្នះពានរង្វាន់ចំនួន១៣នៅឯកីឡដ្ឋាន Nou Camp រួមមានពានរង្វាន់ La Liga ចំនួន៤ដង និងពានរង្វាន់ Champions League ម្តង។

សេចក្តីថ្លែងការណ៍របស់ក្លិប Barcelona បានសរសេរថា “ក្រុម Sevillaនឹងបង់លុយឲ្យ Barcelona ១,៥ លានអឺរ៉ូបូកនឹងលក្ខខណ្ឌមួយចំនួនទៀត” ៕ដោយ៖ភារៈ