ខេត្តកណ្តាល៖ បុរស២នាក់ជិះម៉ូតូឌុបគ្នាក្នុងល្បឿនលឿនទំនងជាស្រវឹងស្រាផងនោះបានជ្រុលចង្កូតទៅបុករនាំងដែក និង រថយន្តឈប់ស្ងៀមនៅលើចិញ្ចើមផ្លូវ ត្រង់ចំណុចខាងមុខប៉ុស្តិ៍នគរបាលរដ្ឋបាលកំពង់សំណាញ់ បណ្តាលឲ្យស្លាប់បាត់បង់ជីវិតទាំង២នាក់ពេលបញ្ជូនទៅសង្គ្រោះនៅមន្ទីរពេទ្យជ័យជំនះ ។

ហេតុការណ៍គ្រោះថ្នាក់ចរាចរណ៍បានកើតឡើងតាមបណ្តោយផ្លូវលេខ១១៥ ត្រង់ចំណុចខាងមុខប៉ុស្តិ៍នគរបាលរដ្ឋបាលកំពង់សំណាញ់ ស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ខេត្តកណ្តាល កាលពីវេលាម៉ោង៤ និង១០នាទីទាបភ្លឺ ថ្ងៃទី៦ ខែកុម្ភៈ ឆ្នាំ២០១៦ ។

ជនរងគ្រោះទាំង២នាក់ត្រូវគេស្គាល់ឈ្មោះ សុភ័ក្រ អាយុ៣៣ឆ្នាំ នៅស្រុកព្រះស្តេច ខេត្តព្រៃវែង ជាអ្នកបើកបរម៉ូតូម៉ាកហុងដាស្គុបពី ពណ៌ក្រហមលាយស ពាក់ស្លាកលេខ ភ្នំពេញ1CQ-9387 និងម្នាក់ទៀតមិនទាន់ស្គាល់អត្តសញ្ញាណ ។

មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា នៅមុនពេលកើតហេតុគេមិនដឹងថាជនរងគ្រោះទាំង២នាក់នោះផឹកស្រាស្រវឹងចេញពីណាមកនោះទេ ស្រាប់តែជិះមកបុករះរនាំងដែកនិងរថយន្តដែលឈប់ស្ងៀមនៅខាងមុខប៉ុស្តិ៍នគរបាលរដ្ឋបាលកំពង់សំណាញ់ ពេញមួយទំហឹង បណ្តាលឲ្យដួលបោកទៅលើផ្លូវធ្វើឲ្យបុរសជាអ្នកបើកបរម៉ូតូស្លាប់ភ្លាមៗនោកន្លែងកើតហេតុ រីឯអ្នករួមដំំណើររងរបួសធ្ងន់នឹងបានស្លាប់ពេលបញ្ជូនទៅសង្គ្រោះនៅមន្ទីរពេទ្យជ័យជំនះក្រុងតាខ្មៅ ។

សាកសពជនរងគ្រោះទាំង២នាក់ត្រូវបានយកទៅតម្កល់ទុក នៅសាលដាក់សពរបស់មន្ទីរពេទ្យបង្អែកជ័យជំនះ រីឯមធ្យោបាយត្រូវបានសមត្ថកិច្ចយកមករក្សារទុកនៅអធិការដ្ឋានក្រុងតាខ្មៅបណ្តោះអាសន្ន ។

សមត្ថកិច្ចនគរបាលបានបញ្ជាក់ថា ករណីគ្រោះថ្នាក់ខាងលើបណ្តាលមកពីអ្នកបើកបរម៉ូតូបើកម៉ូតូក្នុងល្បឿនលឿន ទំនងជាស្រវឹងបាត់បង់ម្ចាស់ការក៏ជ្រុលចង្កូតទៅបុករនាំងដែកដែលដាក់បាំងរថយន្តជាវត្ថុតាង នៅខាងមុខប៉ុស្តិ៍នគរបាលរដ្ឋបាលកំពង់សំណាញ់តែម្តង ៕

ដោយ៖ ស្អាងជ័យ