ជារឿងអកុសល កំាជ្រួមចមីស៊ីល បានធ្លាក់ចំផ្ទះពលរដ្ឋ បណ្តាលឲ្យកុមារ៣នាក់និងស្រ្តី២នាក់ ក្នុងគ្រួសារមួយនៅប្រទេសអុីរ៉ាក់ស្លាប់ កាលពីថ្ងៃទី២៨ខែកញ្ញា ។ មីស៊ីលខាងលើគឺសំដៅទៅអាកាសយានដ្ឋានអន្តរជាតិទីក្រុងបាដាត ដែលជាទីតាំងឈរជើងនៃកម្លាំងទាហានអាមេរិក។ ប៉ុន្តែមីស៊ីលមិនទៅដល់គោលដៅក៏ធ្លាក់លើផ្ទះពលរដ្ឋ។
នេះជាករណីថ្មីបំផុតក្នុងចំណោមនៃការវាយប្រហារដោយមីស៊ីលទៅលើទីតាំងនានារបស់អាមេរិក ក្នុងទឹកដីអុីរ៉ាក់ ។ ការវាយប្រហារកើតឡើង ក្រោយពេលទីក្រុងវ៉ាស៊ីនតោន ព្រមានបិទស្ថានកុងស៊ុល និងដកទាហាន៣ពាន់នាក់ចេញពីប្រទេសអុីរ៉ាក់។
ពលរដ្ឋស្លាប់និងរបួសដោយសារតែការវាយប្រហារ បែបនេះបានថយចុះក្នុងរយៈពេលប៉ុន្មានឆ្នាំកន្លងមក។ ដូច្នេះ ករណីមីស៊ីលធ្លាក់ចំផ្ទះពលរដ្ឋ កាលពីថ្ងៃទី២៨ខែកញ្ញា គឺជារឿងថ្មីបំផុត ។
មកទល់ពេលនេះ មិនទាន់មានក្រុមណាមួយចេញមុខទទួលស្គាល់ថាជាសកម្មភាពវាយប្រហាររបស់ខ្លួននៅឡើយទេ។
កម្លាំងទាហានអុីរ៉ាក់បានប្រកាសថាក្រុមជ្រុលនិយមដែលរស់នៅក្រៅប្រព័ន្ធច្បាប់បានព្យាយាមបង្កភាពចលាចលដល់ពលរដ្ឋអុីរ៉ាក់។
ចាប់តាំងពីខែតុលាឆ្នាំ២០១៩ មកដល់ខែកក្កដាឆ្នាំ២០២០មានការវាយប្រហារដោយមីស៊ីលចំនួន៣៩លើកទៅលើទីតាំងអាមេរិកក្នុងប្រទេសអុីរ៉ាក់ ។ មន្ត្រីយោធាអាមេរិកបានបញ្ជាក់ថាក្រុមប្រដាប់អាវុធស្និទ្ធនឹងប្រទេសអុីរ៉ង់ ជាអ្នកវាយប្រហារ៕
