អន្តរជាតិ៖ធនាគារពិភពលោក បានប្រកាសពីកញ្ចប់ជំនួយមានទឹកប្រាក់ដល់ទៅ១២ពាន់លានដុល្លារ ជួយដល់ប្រទេសក្រីក្រសម្រាប់ទិញវ៉ាក់សាំងប្រឆាំងកូវីដ-១៩។
តាមគម្រោងខាងលើរបស់ ធនាគារពិភពលោក ទឹកប្រាក់ទាំងនោះអាចទិញវ៉ាក់សាំងសម្រាប់បង្ការការឆ្លងកូវីដ-១៩ ដល់មនុស្ស២ពាន់លាននាក់។ ដើម្បីធានាដល់បណ្តាប្រទេសក្រីក្រមានប្រាក់ចំណូលទាបធនាគារពិភពលោកបានស្នើដល់ប្រទេសអ្នកមានដើរតួនាទីសំខាន់ បើកប្រាក់ទាំងនោះក្នុងរយៈពេល១២-១៨ខែខាងមុខ។
គិតមកដល់ព្រឹកថ្ងៃទី៣០ ខែកញ្ញា នៅទូទាំងពិភពលោកមានករណីឆ្លងកូវីដ-១៩ កើនឡើងដល់ទៅជាង ៣៣,៧៧លាននាក់ និងស្លាប់កើនឡើងជាង១លាននាក់។ ប៉ុន្តែក៏មានអ្នកព្យាបាលជាសះស្បើយជាង២៥លាននាក់ផងដែរ។
ជាមួយគ្នានោះ អង្គការសុខភាពពិភពលោកWHO ក៏បានអំពាវនាវដល់បណ្តាប្រទេសសូមមានវិធានការទប់ស្កាត់ការឆ្លងកូវីដ-១៩ឲ្យបានល្អបំផុតមុនពេលវ៉ាក់សាំងប្រើប្រាស់ជាផ្លូវការ ។ ប្រសិនបើទប់ស្កាត់មិនបានល្អនោះទេ នឹងមានអ្នកស្លាប់ដល់ទៅ២លាននាក់ដោយកូវីដ-១៩ ។
នៅពេលនេះប្រទេសដែលនៅមានចំនួនអ្នកឆ្លងកើនឡើងក៏បានបន្តអនុវត្តច្បាប់គ្រាមានអាសន្ន ដើម្បីទប់ស្កាត់ ប្រកបដោយប្រសិទ្ធភាព។ ទន្ទឹមនឹងនោះក៏មានប្រទេសជាច្រើនបានបើកដំណើរការហោះហើរអន្តរជាតិរបស់ខ្លួនឡើងវិញផងដែរ ក្នុងនោះមានជប៉ុន ចិន ថៃ វៀតណាម កូរ៉េខាងត្បូង…ដែលជាប្រទេសទប់ស្កាត់ការឆ្លងកូវីដ-១៩បានល្អបំផុត៕ដោយ៖ធី រីណា
