ភ្នំពេញ៖ បើយោងតាមប្រភពព័ត៌មានមួយបានលួចបង្ហើបប្រាប់ថា បុរសម្នាក់ ដែលជាមេកត់កន្ទុយលេខ(ឆ្នោតវៀតណាម) បន្ទាប់ពីត្រូវកម្លាំងនគរបាលខណ្ឌសែនសុខចុះបង្រ្កាប និងឃាត់ខ្លួនជាក់ស្តែងពាក់ព័ន្ធករណីបើកលេងល្បែងស៊ីសងខុសច្បាប់នោះ ពេលនេះកំពុងរត់ការទៅតុលាការដើម្បីសុំដោះលែងឲ្យមានសេរីភាពឡើងវិញ ។
សូមជម្រាបថា កម្លាំងប៉ុស្តិ៍នគរបាលអូរបែកក្អម ខណ្ឌសែនសុខ បានឃាត់ខ្លួនជនសង្ស័យម្នាក់ កាលពីថ្ងៃទី១៨ ខែតុលា ឆ្នាំ២០២០ វេលាម៉ោង៣និង៣០នាទីរសៀល ស្ថិតនៅចំណុចមុខផ្ទះលេខ៣៨៨ ផ្លូវបេតុង(វត្តអង្គតាមិញ) ភូមិទ្រុងមាន់ សង្កាត់អូរបែកក្អម ខណ្ឌសែនសុខ ។
ជនសង្ស័យឈ្មោះ ស៊ិន បូរី ភេទប្រុស អាយុ៣៥ឆ្នាំ ជនជាតិខ្មែរ មុខរបរលក់កាហ្វេ ស្នាក់នៅផ្ផ្ទះលេខ៣៨៨ ផ្លូវបេតុង(វត្តអង្គតាមិញ) ភូមិទ្រុងមាន់ សង្កាត់អូរបែកក្អម ខណ្ឌសែនសុខ (គ្មានសារធាតុញៀន) ត្រូវបានសមត្ថកិច្ចឃាត់ខ្លួនពាក់ព័ន្ធករណីបើកលេងល្បែងស៊ីសងខុសច្បាប់(កត់ឆ្នោតវៀតណាម) ។
ក្រោយឃាត់ខ្លួន កម្លាំងជំនាញបានដកហូតវត្ថុតាងរួមមាន៖ ប្រដាប់អុកថ្ងៃខែឆ្នាំចំនួន១ , លុយខ្មែរ១៩.០០០រៀល ,បញ្ជីកត់ឆ្នោត១សន្លឹក , ក្រដាសសម្រាប់កត់ឆ្នោត១ដុំធំ ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី ៕ដោយ៖ ចន្ទ លីហ្សា
