ពលរដ្ឋបារាំងនៅទីក្រុងប៉ារីសនាំគ្នាធ្វើបាតុកម្មជាទ្រង់ទ្រាយធំនៅថ្ងៃទី​១៨ ខែតុលា​​ ដោយលើកស្លាកបដា​ មានសរសេរអក្សរថា «ប្រឆាំង​​មនោគមន៍អាក្រក់» «ខ្ញុំជាSamuel» ដើម្បីជាការគោរពដល់សាស្ត្រាចារ្យរងគ្រោះត្រូវក្រុមអ៊ិស្លាមជ្រុលនិយមអារនៅជាយក្រុងប៉ារីស​។
ពលរដ្ឋបារាំងបង្ហាញពីក្តីឈឺចាប់យ៉ាងខ្លាំង​​ ដោយនាំគ្នាដង្ហែក្បួនបាតុកម្ម និងបង្ហាញការឈឺចាប់ ចំពោះការស្លាប់​របស់សាស្ត្រាចារ្យ Samuel Paty វ័យ​៤៧ឆ្នាំ ត្រូវ​យុវជនអ៊ិស្លាមជ្រុលនិយមកាត់ក្បាលកាលពីថ្ងៃទី​១៦ខែតុលា​។
ក្រៅពីទីក្រុងប៉ារីស នៅទីក្រុង Bordeaux ពលរដ្ឋក៏បាននាំគ្នា ដង្ហែក្បួនបាតុកម្មប្រឆាំងនិឹងអំពើព្រៃផ្សៃនេះដែរ។ រដ្ឋាភិបាលបារាំងបានប្រកាសថា នៅថ្ងៃទី​២១ ខែតុលា ជាថ្ងៃកាន់ទុក្ខទូទាំងប្រទេសដើម្បីគោរពវិញ្ញាណក្ខន្ធសាស្ត្រាចារ្យ​ត្រូវគេសម្លាប់។
ក្រៅពីទីក្រុងប៉ារីស នៅមានទីក្រុងToulouse , Bordeaux, Lyon, Strasbourg, Nantes, Marseille និង Lille ក៏បាននាំគ្នាធ្វើបាតុកម្មផងដែរ។
សាស្ត្រាចារ្យ​Samuel Paty បង្រៀនពីប្រវត្តិសាស្ត្រនិងភូមិសាស្ត្រ​​ នៅសាលាមធ្យមសិក្សា Bois-d’Aulne ស្ថិតនៅស្រុក​Conflans-Sainte-Honorine ចម្ងាយពីទីក្រុងប៉ារីស​៣០ គីឡូម៉ែត្រ។ ជនដៃដល់មានឈ្មោះ Abdullakh Anzoro អាយុ​១៨ឆ្នាំត្រូវប៉ូលិសបាញ់សម្លាប់ដោយសារមានសកម្មភាពប្រឆាំងប៉ូលិស​។
ជាមួយគ្នានេះដែរ បារាំង បានសម្រេចបណ្តេញជនបរទេស​ដែលមានទស្សនៈអ៊ិស្លាមជ្រុលនិយម២៣១នាក់​ចេញពីបារាំង​ ។ អ្នកទាំងនោះស្ថិតនៅក្នុងបញ្ជីតាមដាននៃការវាយប្រហារភេរវកម្ម​។ ក្នុងចំណោមនោះមាន​១៨០នាក់បានចាប់ឃុំខ្លួនរួចហើយ នៅសល់​៥១នាក់ទៀត​​កំពុងតែស្វែងរកចាប់ខ្លួន ៕

ដោយ៖ធីរីណា