ខេត្តត្បូងឃ្មុំ ៖ កុមារីអាយុ៩ឆ្នាំម្នាក់ រងគ្រោះបាត់បង់ព្រហ្មចារីដោយសារតែឪពុកមាចាប់បង្ខិតបង្ខំរំលោភ៣ដងទាំងប្រព្រឹត្តនៅក្នុងបន្ទប់ទឹក និងនៅលើផ្ទះ ដែលមកស្នាក់នៅជាមួយ ស្ថិតក្នុងភូមិសន្ទៃទី១ ឃុំកក់ ស្រុកពញាក្រែក ។
មន្ត្រីប៉ុស្តិ៍នគរបាលរដ្ឋបាលកក់អោយដឹងថា កាលពីថ្ងៃទី១៨ខែតុលាឆ្នាំ២០២០ វេលាម៉ោង០៨ និង០០នាទី បានទទួលព័ត៌មានពីលោកមេភូមិសន្ទៃទី១ និងក្រុមប្រឹក្សាឃុំកក់ថាមានករណីរំលោភសេពសន្ថវៈលើ ក្មេង ស្រីឈ្មោះ វ.ថ ភេទស្រី អាយុ០៩ឆ្នាំ ជាតិខ្មែរ ដែលមកស្នាក់នៅជាមួយឈ្មោះ ស្ងួន សុ គុណ ភេទប្រុស អាយុ៤៩ឆ្នាំ ជាតិខ្មែរ ក្នុងភូមិសន្ទៃទី១ ឃុំកក់ ស្រុកពញាក្រែក ។
ក្រោយពីបានទទួលបានព័ត៌មាននេះភ្លាម កម្លាំងប៉ុស្តិ៍នគរបាលរដ្ឋបាលកក់សហការជាមួយកម្លាំងជំនាញនៃអធិការដ្ឋាននគរបាលស្រុកពញាក្រែក និងការិយាល័យកិច្ចការនារីស្រុកពញាក្រែក បានយកកុមារីឈ្មោះ វ.ថ អាយុ០៩ឆ្នាំ ជាតិខ្មែរ ទៅធ្វើកោសល្យវិច័យ នៅមន្ទីរពេទ្យបង្អែកស្រុកពញាក្រែក ។ ជាលទ្ធផលពិនិត្យឃើញថា ពិតជាត្រូវបានរងការបំពាន ផ្លូវភេទលើក្មេងស្រីរងគ្រោះប្រាកដមែន ។
មន្ត្រីប្រាប់បន្តថា តាមការបំភ្លឺរបស់កុមារីឈ្មោះ វ.ថ បានឲ្យដឹងថាៈ ខ្លួនត្រូវបានឈ្មោះ ស្ងួន សុគុណ ត្រូវជាឪពុកធំ បានចាប់រំលោភសេពសន្ថវៈ ចំនួន០៣ដង រួចមកហើយ គឺលេីកទី១ ក្នុងបន្ទប់ទឹក លេីកទី២នៅលើផ្ទះ និងលេីកទី៣នៅលេីផ្ទះដដែល ស្ថិតក្នុងភូមិសន្ទៃទី១ ឃុំកក់ ស្រុកពញាក្រែក ។ រហូតមកដល់ថ្ងៃទី១៧ ខែតុលា ឆ្នាំ២០២០ ទើបកុមារីរងគ្រោះ ប្រាប់ដល់ លោកមេភូមិសន្ទៃទី១ នូវរឿងហេតុខាងលើ ។
យោងតាមកំណត់សួរនាំនេះ សមត្ថកិច្ចចុះធ្វេីការហេីយនាំខ្លួនជនសង្ស័យឈ្មោះ ស្ងួន សុគុណ ភេទប្រុស អាយុ៤៩ឆ្នាំ មកកាន់ប៉ុស្តិ៍នគរបាលរដ្ឋបាលកក់ និងបញ្ជូនមកអធិការដ្ឋាននគរបាលស្រុកពញាក្រែកដើម្បីបំពេញសំណុំរឿងតាមនីតិវិធី ៕
ដោយ ៖ វណ្ណៈ
