ខេត្តសៀមរាប៖ សមត្ថកិច្ចខេត្តសៀមរាប បានបង្ហើបប្រាប់ថា នៅព្រឹកថ្ងៃទី២២ ខែតុលា ឆ្នាំ២០២០នេះ សមត្ថកិច្ចបានចាប់ខ្លួនប្តីមិនទាន់រៀបការដែលបាញ់សម្លាប់ប្រពន្ធក្នុងឡាន តែមិនស្លាប់ នៅស្រុកក្រឡាញ់នោះបានហើយ ។

ជនបង្កត្រូវបានសមត្ថកិច្ចចាប់ខ្លួននៅខេត្តបាត់ដំបង និងកំពុងបញ្ជូនបន្តមកស្នងការដ្ឋាននគរបាលខេត្តសៀមរាប ដើម្បីបន្តនីតិវិធី ។

ហេតុការណ៍នេះ កើតឡើងកាលពីវេលាម៉ោង២ៈ៥០នាទី រំលងអធ្រាត្រឈានចូលថ្ងៃទី២២ ខែតុលា ឆ្នាំ២០២០នេះ នៅចំណុចភូមិគោកចាស់ ឃុំស្រណាល ស្រុកក្រឡាញ់ ខេត្តសៀមរាប ។

តាមការរៀបរាប់របស់នារីរងគ្រោះដែលមានអាយុ២៧ឆ្នាំបានឱ្យដឹងថា នៅវេលាកើតហេតុ រូបនាងត្រូវបានប្តីពុំទាន់បានរៀបការបាញ់សម្លាប់នៅក្នុងរថយន្ត ត្រូវចំណុចលើសុដន់ផ្នែកខាងឆ្វេង បៀមគ្រាប់ជាប់ក្នុងសាច់ តែសំណាងល្អ នាងមិនស្លាប់ ហើយបានបើកទ្វាររថយន្ត រត់ចេញក្រៅ ស្រែកឱ្យគេជួយ ។

ស្របពេលនោះ កម្លាំងនគរបាល និង កម្លាំងប្រជាការពារដែលការពារសន្តិសុខ សុវត្ថិភាពជូនសម្តេចតេជោ ហ៊ុន សែន ដែលឈរជើងនៅទីនោះ បានជួយសង្គ្រោះទាន់ពេលវេលា និងបានបញ្ជូនមកកាន់មន្ទីរពេទ្យបង្អែកខេត្តសៀមរាប។

ជនរងគ្រោះ បានបន្តទៀតថា ជនបង្កដែលជាប្ដីអត់ខាន់ស្លា ឈ្មោះ ចាន់ ផល ហៅចាន់ ពៅ ឬ គុជ ផល្លី អាយុ៥៧ឆ្នាំ ។

ជាមួយគ្នានេះ នៅព្រឹកថ្ងៃទី២២ ខែតុលា ឆ្នាំ២០២០ លោក សៀង ណាំ អ្នកតំណាងរាស្ត្រមណ្ឌលខេត្តសៀមរាប ក៏បានទៅសួរសុខទុក្ខនារីរងគ្រោះដល់មន្ទីរពេទ្យផ្ទាល់ផងដែរ ៕ ដោយ៖ចេស្តា