លោក Zinedine Zidane នឹងដឹកនាំក្រុម Real Madrid របស់គាត់ទៅទឹកដី Camp Nou ជាលើកដំបូងសម្រាប់ការប្រកួត EI Clasico រដូវកាល២០២០-២០២១ ក្នុងនាមជាគ្រូបង្វឹកឆ្នាំនេះ។ គ្រូបង្វឹកសញ្ជាតិបារាំងរូបនេះកំពុងតែស្វែងរកវិធីមួយដើម្បីនាំកីឡាកររបស់ខ្លួនឲ្យលេងបានល្អឡើងវិញជាមួយនឹងក្រុមដែលមិនត្រូវបានទិញកីឡាករចូលបន្ថែមអំឡុងពេលទីផ្សារដោះដូរកីឡាករ។

ប៉ុន្តែលោក Zidane ធ្លាប់ដឹកនាំមិនដែលចាញ់នៅទឹកដី Camp Nou ទេក្នុងការប្រកួត៥លើករបស់គាត់ដោយបានបញ្ជាក់ពីកំណត់ត្រានៅទីនោះថា គ្រូបង្វឹកល្អជាងគេទាំងអស់ដែលធ្លាប់ដឹកនាំក្រុម Real Madrid កន្លងមក។

ក្នុងដំណើរប្រកួតក្របខ័ណ្ឌ La Liga ទៅកាន់តំបន់ Catalonia ដើម្បីប្រឈមមុខនឹងក្រុម Barcelona គឺជាកិច្ចការដ៏គួរឱ្យចាប់អារម្មណ៍មួយ។ ប៉ុន្តែទឹកដី Camp Nou នាំមកតែអនុស្សាវរីយ៍ល្អៗសម្រាប់អ្នកចាត់ការក្រុមReal Madrid រូបនេះ។ គ្មានអ្វីដែលមិនអាចធ្វើបានសម្រាប់គាត់ទេ គាត់គឺជាគ្រូបង្វឹកដែលទទួលបានជោគជ័យបំផុតទី២ ក្នុងប្រវត្តិសាស្រ្តរបស់ក្លិប។ ការប្រកួតចាញ់ក្រុម Cadiz និងចាញ់ក្រុម Shakhtar Donetsk បានធ្វើឱ្យមានសំណួរ និងការព្រួយបារម្ភ ប៉ុន្តែលោក Zidane បានអះអាងថានឹងជំរុញទឹកចិត្តកូនក្រុមលោកឲ្យធ្វើបានល្អ។

ក្នុងអំឡុងពេលលោក Zidane ដឹកនាំក្រុម Real Madrid ធ្លាប់ជួបក្រុមBarcelona ចំនួន៩ ដងក្នុងនាមជាគ្រូបង្វឹក ហើយចាញ់២ដងប៉ុណ្ណោះ។ កំណត់ត្រានៃការឈ្នះ៤លើក និងស្មើ៣លើក ធ្វើឲ្យគ្រូបង្វឹករូបនេះក្លាយជាអ្នកដែលមានប្រជាប្រិយភាពជាងគេ។

ការប្រកួត EI Clasico ដំបូងរបស់គាត់គឺជាអនុស្សាវរីយ៍ដែលមិនអាចបំភ្លេចបាននៅឯកីឡដ្ឋាន Camp Nou កាលពីថ្ងៃទី២ ខែមេសា ឆ្នាំ២០១៦ ដោយបញ្ចប់ការឈ្នះ៣៩ប្រកួតរបស់ Barcelona និងសងសឹកការបរាជ័យ៤-០ ក្រោមការដឹកនាំរបស់លោក Rafael Benitez ។

សូមបញ្ជាក់ថា ការប្រកួត EI Clasico រវាងក្រុមខ្លាំងទាំងពីរ១គឺក្រុម Barcelona និងក្រុម Real Madrid នឹងត្រូវធ្វើឡើងនៅកីឡដ្ឋាន Camp Nou ទឹកដីរបស់ក្រុម Barcelona នៅថ្ងៃទី២៤ ខែតុលានេះ វេលាម៉ោង៩យប់ ម៉ោងនៅកម្ពុជា។ តើក្រុមខ្លាំងទាំង២មួយណានឹងទទួលបាន៣ពិន្ទុ និងមានអ្វីកើតឡើងនៅយប់នេះ? ៕

    

ដោយ៖ភារៈ