បណ្តាមន្ត្រីការបរទេសរបស់សហគមន៍អឺរ៉ុបបានប្រកាសថា អឺរ៉ុបនឹងដំឡើងពន្ធនាំចូលទំនិញអាមេរិក មានទឹកប្រាក់សរុប៤ពាន់លានដុល្លារ នៅក្នុងសប្តាហ៍ក្រោយដើម្បីសងសឹកដល់ទីក្រុងវ៉ាស៊ីនតោនដែលផ្តល់ជំនួយដល់ក្រុមហ៊ុនផលិតយន្តហោះ ប៊ូអ៊ុីង។
រដ្ឋាភិបាលអឺរ៉ុប បានគាំទ្រដល់ការដំឡើងពន្ធលើទំនិញអាមេរិក ក្នុងពេលដែលបណ្តារដ្ឋមន្ត្រីក្រសួងពាណិជ្ជកម្មអឺរ៉ុបជួបប្រជុំគ្នានៅថ្ងៃទី៩ខែវិច្ឆិកា ហើយនៅថ្ងៃទី១០ ឬ១១ខែវិច្ឆិកា នឹងដំឡើងពន្ធលើទំនិញអាមេរិកជាផ្លូវការ។
តាមគម្រោងអឺរ៉ុបនឹងដំឡើងពន្ធលើទំនិញរួមមាន យន្តហោះ និងសម្ភារហោះហើរ ផលិតផលកសិកម្ម ផ្លែឈើ សម្ភារសម្រាប់វិស័យកាស៊ីណូ។
កន្លងមក លោកRobert Lighthizer តំណាងក្រសួងពាណិជ្ជកម្មអាមេរិកបានព្រមាន ដល់អឺរ៉ុបមិនត្រូវដំឡើងពន្ធសងសឹកអាមេរិកវិញនោះឡើយ។ ប្រសិនបើអឺរ៉ុប បន្តដំឡើងពន្ធតបតអាមេរិកនោះ នឹងទទួលរងការឆ្លើយតបវិញយ៉ាងខ្លាំងបំផុត។
ទំនាក់ទំនងរវាងអឺរ៉ុប និងអាមេរិក ប្រឈមមុខតានតឹងដាក់គ្នា ចាប់តាំងពីប្រធានាធិបតីដូណាល់ ត្រាំ ឡើងកាន់តំណែងប្រធានាធិបតីអាមេរិក ដោយលោកបានអនុម័តគោលនយោបាយអាមេរិកជាចម្បង ប៉ះពាល់យ៉ាងខ្លាំងដល់ទំនាក់ទំនង ជាមួយប្រទេសជាសម្ពន្ធមិត្តអឺរ៉ុបនឹងដំឡើងពន្ធលើទំនិញអាមេរិកមានទឹកប្រាក់៤ពាន់លានដុល្លារនៅសប្តាហ៍ក្រោយ៕ ដោយ៖ធីរីណា
