ខេត្តបាត់ដំបង÷ លោក ឈឿង គឹមសុង ប្រធានការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបង ដោយបានទទួលការចង្អុលបង្ហាញពីលោក ស្នងការនគរបាលខេត្តលោកបានដឹកនាំកម្លាំងនគរបាលខេត្តបាត់ដំបងចុះអនុវត្តន៍ដីកាឃាត់ខ្លួននិងនាំខ្លួនជនសង្ស័យ ចំនួន ០២ នាក់ ពាក់ព័ន្ធនឹងករណី លួចមានស្ថានទម្ងន់ទោសដោយសារការប្រព្រឹត្តអំពេីហិង្សា ។
លោកថាដោយអនុវត្តន៍តាមការណែនាំបញ្ជាផ្ទាល់ពី លោកឧត្ដមសេនីយ៍ត្រី សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោកវរសេនីយ៍ឯក លឹម ពុទ្ធីឡា ស្នងការរងទទូលផែនការងារនគរបាលព្រហ្មទណ្ឌ និង មានការសម្របសម្រួលនីតិវិធីពីលោក គឺ ប៊ុណ្ណារ៉ា ព្រះរាជអាជ្ញានៃអយ្យការអមសាលាដំបូងខេត្តបាត់ដំបង នៅថ្ងៃទី ២៥ ខែ វិច្ឆិកា ឆ្នាំ ២០២០ កម្លាំងលោកបានឃាត់ខ្លួនជនសង្ស័យម្នាក់នៅចំណុចលេីផ្លូវជាតិលេខ៥ ស្ថិតក្នុងភូមិ តាសី ឃុំតាម៉ឺន ស្រុកថ្មគោលខេត្តបាត់ដំបង តាមដីកានាំខ្លួន លេខ ១០៤២ ត.ព្រ ចុះថ្ងៃទី ១៣ ខែវិច្ឆិកា ឆ្នាំ ២០២០ របស់លោក ចាប តុលា ចៅក្រមស៊េីបសួរសាលាដំបូងខេត្តបាត់ដំបង។ ដីកានេះបានបង្គាប់ឲ្យនាំខ្លួន ឈ្មោះ ទិត្យ រ៉ូហ្សែត ហៅ ហ្សិត ភេទប្រុស អាយុ ២៣ឆ្នាំ មានទីលំនៅភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង ដែលពាក់ព័ន្ធនឹងករណី លួចមានស្ថានទម្ងន់ទោសដោយសារការប្រព្រឹត្តអំពេីហិង្សា នៅចំណុចហាងខារ៉ាអូខេយីហោ ត្រចៀកកាំ ស្ថិតក្នុងភូមិរំចេក៣ សង្កាត់រតនៈ ក្រុងបាត់ដំបង ខេត្ត បាត់ដំបង កាលពីថ្ងៃទី ២៧ ខែតុលា ឆ្នាំ ២០២០ កន្លងទៅ។
លោក ឈឿង គឹមសុង
បន្តថា ជាមួយនេះកម្លាំងរបស់លោកក៏អនុវត្តន៍ដីកាមួយទៀតកាលពីម៉ោង១៣និង៤៦នាទីថ្ងៃដដែលនៅចំណុចភូមិរំចេក២ សង្កាត់រតនៈក្រុង- ខេខេត្តបាត់ដំបង។ពេលនោះកម្លាំងក្រុមអន្តរាគមន៍ បង្ការ បង្ក្រាប បានសហការជាមួយ កម្លាំងអធិការដ្ឋាននគរបាលក្រុងបាត់ដំបង ចុះអនុវត្តន៍ដីកាបង្គាប់ឲ្យនាំខ្លួនលេខ ១០៤៣ របស់លោក ចាប តុលា ចៅក្រមស៊េីបសួរ សាលាដំបូងខេត្តបាត់ដំបង ដែលបានបង្គាប់ឲ្យនាំខ្លួន ជនសង្ស័យឈ្មោះ ទោម សម្បត្តិ ហៅ ឆាយ ភេទប្រុស អាយុ ៣០ ឆ្នាំ មានទីលំនៅ ភូមិរំចេក២ សង្កាត់រតនៈ ក្រុង-ខេត្តបាត់ដំបង ដែលពាក់ព័ន្ធនឹងករណី លួចមានស្ថានទម្ងន់ទោស ដោយបានប្រព្រឹត្តអំពេីហិង្សា នៅចំណុចហាងខារ៉ាអូខេ យីហោត្រចៀកកាំ ស្ថិតក្នុងភូមិរំចេក៣ សង្កាត់រតនៈក្រុង- ខេត្តបាត់ដំបង កាលពីថ្ងៃទី ២៧ ខែ តុលា ឆ្នាំ ២០២០នោះដែរ ។
បច្ចុប្បន្នជនសង្ស័យទាំងពីរនាក់ត្រូវកម្លាំងការិយាល័យនគរបាលជំនាញធ្វើការសាកសួរដើម្បីកសាងសំណុំរឿងបញ្ជូនទៅសាលាដំបូងខេត្តបាត់ដំបងចាត់ការតាមនីតិវិធី៕
ដោយ÷ ស សារ៉េត
