ភ្នំពេញ៖ មានការភ្ញាក់ផ្អើលយ៉ាងខ្លាំងលើគេហទំព័រ និងប្រព័ន្ធផ្សព្វផ្សាយ បណ្តាញសង្គម Facebook ខណៈល្បីថា លោក ប្រាជ្ញ សីហា អភិបាលរងខណ្ឌប្ញស្សីកែវនិងកងកម្លាំងនៃបញ្ជាការឯកភាពខណ្ឌប្ញស្សីកែវចំនួន១៣នាក់ទៀត ត្រូវបានកងកម្លាំងកងរាជអាវុធហត្ថ ដែលដាក់គោលដៅនៅក្នុងមូលដ្ឋានសង្កាត់ឬឫស្សីកែវ ចាក់សោរ ឃាត់ខ្លួន ខណៈលោកអភិបាលរងខណ្ឌរូបនេះបានដឹកនាំកងកម្លាំងនៃបញ្ជាការឯកភាពខណ្ឌចុះទៅឃាត់សំណង់ដែលបានសាងសង់រំលោភលើដីរបស់រដ្ឋ ។
សូមជម្រាបថា ហេតុការណ៍នេះ បានបង្កឲ្យមានការភ្ញាក់ផ្អើលកាលពីម៉ោងជិត១២ថ្ងៃត្រង់ ថ្ងៃទី០២ ធ្នូ ២០២០ នៅចំណុចអតីតក្រុមហ៊ុនម៉ាកវ៉ែល តាមផ្លូវជាតិលេខ៥ សង្កាត់ឬឫស្សីកែវ ខណ្ឌឬឫស្សីកែវ ។ តែមិនមានប្រភពណាមួយបញ្ជាក់អោយលម្អិតជាផ្លូវការក្នុងសកម្មភាពនេះនៅរសៀលថ្ងៃទី២ ខែធ្នូ ដដែលនោះ។
ដោយឡែកប្រភពខ្លះបានអោយដឹងទៀតថា នៅវេលាកើតហេតុខាងលើ គេឃើញកម្លាំងកងរាជអាវុធហត្ថប្រមាណជាង២០នាក់ បានចេញពីគោលដៅដែលបានសាងសង់រំលោភលើដីរបស់រដ្ឋព្រមទាំងចាក់សោបង្ខាំងមន្ត្រីរាជការរបស់សាលាខណ្ឌទាំងអស់ចំនួន ១៣នាក់ ដែលដឹកនាំដោយលោកអភិបាលរងខណ្ឌម្នាក់ គឺលោក ប្រាជ្ញ សីហា។ ប៉ុន្តែភ្លាមៗនោះ អង្គភាព «នគរដ្រេហ្គន»មិនអាចទំនាក់ទំនងសុំការបំភ្លឺបានទេ ពីលោក ប្រាជ្ញ សីហា ខណៈទូរស័ព្ទត្រូវបានបិទ។
សូមបញ្ជាក់ តាមប្រភពខ្លះបានបង្ហើបថា បន្ទាប់ពីមានហេតុការណ៍កើតឡើង លោក ប្រាជ្ញ សីហា ក៏បានរាយការណ៍ទៅអភិបាលខណ្ឌ និងឃើញកម្លាំងនគរបាលជាច្រើននាក់ទៅអន្តរាគមន៍ ដោយមានការសម្របសម្រួលពីលោក ជា ពិសី អភិបាលខណ្ឌ ទើបកម្លាំងកងរាជអាវុធហត្ថ បានបើកទ្វារអោយចេញវិញ។
ក្រោយពេលអាជ្ញាធរ និងសមត្ថកិច្ច ចេញបានបន្តិចគេឃើញ កម្លាំងកងរាជអាវុធហត្ថ២រថយន្ត ប្រដាប់ដោយអាវុធខ្លី វែង បានទៅអន្តរាគមន៍នៅទីកើតហេតុផងដែរ ។
បើតាមមន្ត្រីអាជ្ញាធរមូលដ្ឋានបានបញ្ជាក់ឲ្យដឹងថា ដីអតីតក្រុមហ៊ុនម៉ាក់វែល ជាដីរបស់កំពង់ផែស្វយ័តភ្នំពេញ បានប្រគល់ឲ្យសាលារាជធានីភ្នំពេញ គ្រោងនឹងស្ថានបនាសួនច្បារចាប់ពីស្ពានជ្រោយចង្វារ ទៅដល់មុខអតីតសួនច្បារ សូគីម៉ិចតែគម្រោងសួនច្បារមិនដំណើរការក៏ទុកចោល។
ប្រភពដដែលបញ្ជាក់ថា ក្រោយមកដីនោះ ត្រូវកងរាជអាវុធហត្ថ ផ្ទៃប្រទេសសុំខ្ចីដាក់ចំណតទូក ។ នៅពេលថ្មីនេះតាមព័ត៌មានអោយដឹងថា ដីនោះបានទៅលើក្រុមហ៊ុនមួយ ស្រាប់តែឃើញកងរាជអាវុធហត្ថក៏បានបុកគ្រឹះប្រុងធ្វើដំណង់រឹងមាំទើបអាជ្ញាធរចុះទៅឃាត់ក៏មានរឿងកើតឡើងតែម្តង។
ពាក់ព័ន្ធករណីនេះ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ បានប្រាប់អង្គភាព «នគរដ្រេហ្គន» តាមទូរស័ព្ទនៅយប់ថ្ងៃទី២ ខែធ្នូ ឆ្នាំ២០២០ថា៖ «គ្មានរឿងហេតុចឹងកើតឡើងទេ…អ្នកណាទៅឃាត់ខ្លួនមនុស្សនោះ..? តាមពិតគឺខាងកម្លាំងបានទៅណែនាំ តាមរយៈការជូនដំណឹង ទៅជាគេយល់ច្រឡំផ្សេងទៅវិញ»។ លោកបន្តថា អរគុណ ខាងអង្គភាព «នគរដ្រេហ្គន» មានវិជ្ជាជីវៈ បានសួរមកដើម្បីទទួលយកការពិតពីសមត្ថកិច្ចធ្វើការឆ្លើយតប៕
ដោយ៖ សុខ ខេមរា
https://youtu.be/CbXs_PHl-Ro
