សមាគមអ្នកលេងបាល់បោះជាតិ(NBA)របស់អាមេរិកបានប្រកាសកាលពីថ្ងៃព្រហស្បតិ៍ថា មានការធ្វើតេស្តវិជ្ជមានលើកីឡាករចំនួន៤៨នាក់មានផ្ទុកកូវីដ-១៩ ក្នុងចំណោមកីឡាករបាល់បោះ៥៤៦នាក់ដែលត្រូវបានសាកល្បងធ្វើតេស្តចាប់ពីថ្ងៃទី២៤ ខែវិច្ឆិកា ដល់ថ្ងៃទី៣០ ខែវិច្ឆិកា។

យោងតាមការចេញផ្សាយរបស់សារព័ត៌មានស៊ីនហួរបានឲ្យដឹងកាលពីម្សិលមិញថា ការសាកល្បងជុំសម្រាប់កីឡាករបានប្រកាសចេញមកខណៈដែលកីឡាករបាល់បោះទាំងអស់បានវិលត្រឡប់មកក្រុមរបស់ពួកគេនៅមុនពេលដែលត្រូវចាប់ផ្តើមប្រកួតនៅថ្ងៃទី១១ ខែធ្នូខាងមុខ។ សម្រាប់ការប្រកួតបាល់បោះជ្រើសរើសជើងឯកនៅអាមេរិករដូវកាលនេះគ្រោងនឹងចាប់ផ្តើមនៅថ្ងៃទី ២២ ខែធ្នូ ឆ្នាំ២០២០ខាងមុខ។

សមាគមបាល់បោះNBA បានចេញសេចក្ដីថ្លែងការណ៍ថា ខ្លួននឹងធ្វើតេស្តកីឡាករទាំងអស់របស់ខ្លួនជារៀងរាល់ថ្ងៃពេញមួយរដូវកាលនេះ។

យោងទៅតាមពិធីសារស្តីពីសុខភាព និងសុវត្ថិភាពដែលចេញផ្សាយដោយ NBA នាពេលថ្មីៗនេះកីឡាករទាំងអស់នឹងមិនត្រូវចេញហាត់ប្រាណយ៉ាងហោចណាស់១០ ថ្ងៃប្រសិនបើគាត់បានធ្វើតេស្តវិជ្ជមានជំងឺកូវីដ-១៩ ៕ដោយ៖ភារៈ