🇹🇭ព្រះមហាក្សត្រថៃទទួលបានស្វាគមន៍ពីពលរដ្ឋរាប់សិបពាន់នាក់ ក្នុងពិធីបុណ្យកំណើតអតីតព្រះមហាក្សត្រ

ចែករំលែក៖

ព្រះមហាក្សត្រថៃទទួលបានការស្វាគមន៍ពីពលរដ្ឋរាប់សិបពាន់នាក់ ក្នុងព្រះរាជពិធីបុណ្យខួបកំណើតរបស់អតីតព្រះមហាក្សត្រ

ពលរដ្ឋថៃរាប់សិបពាន់នាក់ពាក់អាវពណ៌លឿងស្វាគមន៍ព្រះមហាក្សត្រ Maha Vajiralongkorn ក្នុងឱកាសដែលព្រះអង្គបានរៀបចំព្រះរាជពិធីបុណ្យខួបកំណើតរបស់ព្រះបិតាព្រះអង្គ។
តាមសារព័ត៌មាន AP ពលរដ្ឋរាប់សិបពាន់នាក់ពាក់អាវពណ៌លឿងស្វាគមន៍ព្រះមហាក្សត្រ Maha Vajiralongkorn នៅថ្ងៃទី៥ខែធ្នូ ។ នេះជាព្រឹត្តិការណ៍សំខាន់បំផុតដែលព្រះអង្គបង្ហាញព្រះវត្តមាននៅទីសាធារណៈ ខណៈមានក្រុមបាតុករប្រឆាំងអូសបន្លាយជាច្រើនខែកន្លងមកទាមទារឲ្យកាត់បន្ថយអំណាចរបស់ព្រះមហាក្សត្រ។
ព្រះមហាក្សត្រMaha Vajiralongkorn និងព្រះមហេសី Suthida ក៏បានលើកព្រះហស្ថស្វាគមន៍ពលរដ្ឋផងដែរ ពេលយាងចូលទៅដល់ទីលានSanam Luang ក្នុងរាជធានីបាងកក ជាទីកន្លែងរៀបចំពិធី។ ពលរដ្ឋគាំទ្របានលើកស្លាកបដាថា«ព្រះមហាក្សត្រម៉ឺនឆ្នាំ»។
បើទោះបីព្រះមហាក្សត្រ Bhumibhol Adulyadej បានចូលទិវង្គត៤ឆ្នាំកន្លងមកហើយក្តី ប៉ុន្តែថ្ងៃប្រសូត្ររបស់ព្រះអង្គនៅតែកត់ត្រាក្នុងប្រតិទិនជាតិ ជាថ្ងៃនៃព្រះបិតា។ ព្រះអង្គបានគ្រងរាជ្យរយៈពេល៧០ឆ្នាំ មានព្រះកិត្តិនាមល្បីល្បាញនៅលើពិភពលោក ពិសេសគឺពលរដ្ឋថៃ។ ព្រះអង្គទទួលបានការគោរពស្រឡាញ់យ៉ាងខ្លាំងពីប្រជារាស្ត្រទាំងអស់ ហើយអ្នកដែលបំពានដល់ព្រះមហាក្សត្រ នឹងត្រូវជាប់គុកដល់ទៅ១៥ឆ្នាំ។ ពលរដ្ឋមិនដែលមានការបញ្ចេញមតិពាក់ព័ន្ធអតីតព្រះមហាក្សត្រឡើយ។
ប៉ុន្តែក្នុងរជ្ជកាលរបស់ព្រះមហាក្សត្រ Maha Vajiralongkorn ក្រុមនិស្សិតបាននាំគ្នាធ្វើបាតុកម្មប្រឆាំងតាំងពីខែសីហាមកទល់ពេលនេះ ដោយទាមទារកែទម្រង់ កាត់បន្ថយអំណាចរបស់ព្រះមហាក្សត្រ៕ ដោយ៖ធីរីណា

ស្ត្រីម្នាក់លើកបដាដែលអាន“ ប្រជាជនរបស់ស្តេច” នៅមុនពិធីប្រារព្ធខួបកំណើតរបស់អតីតព្រះមហាក្សត្រ Bhumibol Adulyadej និងទិវាបិតានៅ Sanam Luang កាលពីថ្ងៃសៅរ៍។ (រូបថតដោយ៖លោក Wichan Charoenkiartpakun/bangkok poste)