ខេត្តកណ្ដាល៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមធ្វេីការបំភ្លឺឆ្លេីយតបជូនសាធារណជន និងម្ចាស់គណនីហ្វេសបុកឈ្មោះ រ៉ាសុខគឿន លក់គ្រឿងសំណង់ ដែលបានផ្សព្វផ្សាយលើគណនីហ្វេសបុកផ្លូវការរបស់ខ្លួន មានខ្លឹមសារថា «ខ្ញុំបាទ រស់នៅ ភូមិទន្លាប់ ឃុំទួលព្រេជ ស្រុកអង្គស្នួល ខេត្តកណ្តាល ដែលបានរងគ្រោះ ដោយសារ អ្នកមានលុយ មួយចំនួន បានទិញកាំភ្លើងដើរបាញ់សត្វតាមវាលស្រែ និង ក្រោយផ្ទះដែលមានព្រៃ ហើយបានមកត្រូវខ្ញុំ ប៉ូលីសរកមុខមិនឃើញសោះ សូមបងប្អូន ឃុំទួលព្រេជ ទាំងអស់ សូមប្រយ័ត្នផង ខ្លាចរងគ្រោះដូចខ្ញុំ ហើយជួយបង្ហោះផង អោយបងប្អូនយើង បានដឹងប្រុងប្រយ័ត្នផង ខ្លាចគ្រោះថ្នាក់ ដូចខ្ញុំបាទ» ។
ក្រោយពីទទួលបានព័ត៌មាននេះភ្លាម ដោយមានបទបញ្ជាពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល នៅថ្ងៃទី១៣ ខែធ្នូ ឆ្នាំ២០២០ លោកវរសេនីយ៍ឯក មាន សំណាង អធិការនគរបាលស្រុកអង្គស្នួល ដឹកនាំកម្លាំងជំនាញស្រុក សហការជាមួយកម្លាំប៉ុស្ដិ៍នគរបាលទួលព្រេជ ចុះដល់កន្លែងកេីតហេតុធ្វេីការស្រាវជ្រាវ ស៊េីបអង្កេតទទួលបានលទ្ធផលឱ្យដឹងថា៖
-ជាករណី៖ ហិង្សាដោយចេតនា (ប្រេីអាវុធបាញ់សត្វ)
-កើតហេតុ៖ថ្ងៃទី១២ ខែធ្នូ ឆ្នាំ២០២០ វេលាម៉ោង ០៧ និង៣០នាទី ចំណុចក្រោយផ្ទះជនរងគ្រោះ ភូមិទន្លាប់ ឃុំទួលព្រេជ ស្រុកអង្គស្នួល ខេត្តកណ្តាល ។
-ជនរងគ្រោះ ឈ្មោះ រិន រ៉ា ភេទប្រុស អាយុ៣២ឆ្នាំ ជនជាតិខ្មែរ មុខរបរលក់គ្រឿងសំណង់ នៅភូមិទន្លាប់ ឃុំទួលព្រេជ ស្រុកអង្គស្នួល ខេត្តកណ្តាល ។
+ជនសង្ស័យ មិនស្គាល់អត្តសញ្ញាណ
+ផលប៉ះពាល់៖ របួសបៀមគ្រាប់ត្រូវដៃស្តាំត្រង់សាច់ដុំ ០១កន្លែង (របួសស្រាល) បច្ចុប្បន្នជនរងគ្រោះលក់ដូរនៅផ្ទះជាធម្មតា ។
+វត្ថុតាងចាប់យករួមមាន៖ បាល់គ្រាប់០១ (បាល់គ្រាប់អាវុធបាញ់សត្វ)។
+សភាពរឿងហេតុ៖
នៅមុនពេលកើតហេតុជនរងគ្រោះកំពុងរៀបចំបេីករ៉ឺម៉កនៅក្រោយផ្ទះ ដេីម្បីដឹកសម្ភារសំណង់ឱ្យភ្ញៀវ ពេលនោះស្រាប់តែមានគ្រាប់អាវុធបាញ់សត្វ មិនដឹងបាញ់ចេញមកពីណា មកត្រូវដៃជនរងគ្រោះបណ្តាលឱ្យរបួសបៀមគ្រាប់ ហេីយជនរងគ្រោះបានយកបាល់គ្រាប់ចេញ និងតាមរកមេីលអ្នកបាញ់ប៉ុន្តែរកមិនឃេីញ ។
-ដោយឡែកសំបកកាទូសចំនួន០១ មិនត្រូវជាមួយបាល់គ្រាប់ខាងលេីទេ ជនរងគ្រោះរេីសបានចម្ងាយប្រហែល៥០០ម៉ែត្រ ពីកន្លែងកេីតហេតុ សំបកកាទូសនេះមិនទាន់មានស្នាមចុចគូថទេ ។
-យោងតាមការបំភ្លឺរបស់សាក្សីឈ្មោះ កាន ធី ភេទប្រុស អាយុ៤០ឆ្នាំ ជនជាតិខ្មែរ មុខរបរកសិករ នៅភូមិទន្លាប់ ឃុំទួលព្រេជ ស្រុកអង្គស្នួល ខេត្តកណ្តាល បានឱ្យដឹងថា នៅវេលាម៉ោងប្រហែល៧ព្រឹក ថ្ងៃកេីតហេតុ ខ្លួនបានទៅចងគោនៅវាលក្រោយភូមិកេីតហេតុ ប្រហែល១គីឡូម៉ែត្របានឮសម្លេងកាំភ្លេីងបាញ់សត្វ ប៉ុន្តែមិនចាប់អារម្មណ៍និងមិនបានឃេីញមនុស្សទេ ។
-សន្និដ្ឋាន ៖ ចំពោះករណីនេះ បង្កឡេីងដោយជនមិនស្គាល់អត្តសញ្ញាណ ប្រេីអាវុធបាញ់សត្វ ប្រហែល១០០ម៉ែត្រពីកន្លែងជនរងគ្រោះឈរបណ្តាលឱ្យត្រូវជនរងគ្រោះមានរបួស ។
-ចំពោះករណីនេះ កម្លាំងជំនាញកំពុងធ្វេីការស្រាវជ្រាវយ៉ាងយកចិត្តទុកដាក់រកអត្តសញ្ញាណជនសង្ស័យ ។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គម មេត្តាជ្រាបជាព័ត៌មាន ។សូមអរគុណ!!!
លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានថ្លែងប្រាប់អង្គភាព នគរដ្រេហ្គន នៅព្រឹកថ្ងៃទី១៣ ខែធ្នូ ឆ្នាំ២០២០ ថា លោកនឹងបើកការស៊ើបអង្កេតបឋមក្នុងរឿងនេះ រកឲ្យឃើញពីមូលហេតុ និងការប្រព្រឹត្ត ខណៈបច្ចុប្បន្នកំពុងធ្វើការស្រាវជ្រាវ ទៅលើសាក្សី សួរនាំជនរងគ្រោះ និងមានតម្រុយខ្លះផងដែរ៕
ដោយ៖ សិលា
