ភ្នំពេញ ៖ នារីម្នាក់បេីករថយន្តLexus GS300 មិនប្រយ័ត្នបានជ្រុលទៅបុករថយន្តស្ទូចកំពុងឈប់ស្តុបពីក្រោយពេញទំហឹង បណ្ដាលឲ្យរងរការខូចខាតយ៉ាងដំណំ បង្កការភ្ញាក់ផ្អេីលដល់អ្នកដំណេីរកាលពីវេលាម៉ោង១១ និង៣០នាទីយប់ ថ្ងៃទី២៦ ខែធ្នូ ឆ្នាំ២០២០ ស្ថិតនៅតាមបណ្ដោយផ្លូវឌួងងៀប កែងផ្លូវវេងស្រេង ក្នុងសង្កាត់ស្ទឹងមានជ័យ៣ ខណ្ឌមានជ័យ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុ រថយន្តម៉ាក HiNO ពណ៌ស ប្រភេទរថយន្តស្ទូច ពាក់ស្លាកលេខភ្នំពេញ 3C-9961 បានធ្វេីដំណេីរតាមបណ្ដោយផ្លូវឌួងងៀប ទិសដៅពីជេីងមកត្បូងក្នុងល្បឿនល្មម ខណៈមកដល់ចំណុចកេីតហេតុក៏ឈប់ចាំស្ទុបក្រហម ភ្លាមនោះក៏មានរថយន្តLexus GS300 មួយគ្រឿង ពណ៌ស ពាក់ស្លាកលេខភ្នំពេញ 2BG – 6760 ដែលបេីកបរដោយនារីម្នាក់ ធ្វេីដំណេីរស្របទិសគ្នាមិនប្រយ័ត្ន មកបុកពីក្រោយពេញទំហឹង បណ្ដាលឲ្យរថយន្តLexus GS300 រងការខូចខាតចំហៀងខាងឆ្វេងយ៉ាងដំណំ តែនារីដែលជាតៃកុងមិនរងរបួសនោះឡេីយ ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ និងបានជួយសម្រួលចរាចរណ៍ដល់អ្នកដំណេីរ ព្រមទាំងសម្របសម្រួលចំពោះភាគីទាំងពីរឲ្យចរចាគ្នាមួយជំហ៊ាន ។ ចុងក្រោយភាគីខាងរថយន្តLexus GS300 ព្រមទទួលកំហុស (ព្រោះបុកគេពីក្រោយ) ហេីយបានព្រមសងថ្លៃខូចខាតទៅលេីរថយន្តស្ទួចដេីម្បីជួសជុលឲ្យស្អាតដូចដេីម ដេីម្បីបញ្ចប់រឿងនៅនឹងកន្លែង៕
ដោយ ៖ ភារ៉ា ដង្កោ
