កំពង់ឆ្នាំង ៖ ជនសង្ស័យម្នាក់ត្រូវបានសមត្ថកិច្ចធ្វើការឃាត់ខ្លួនបានជាមួយនិងថ្នាំញៀនខុសច្បាប់ បន្ទាប់ពីជនសង្ស័យរូបនេះបានធ្វើសកម្មភាពជួយដូរគ្រឿងញៀនដោយប្រើរូបភាពថ្មីដាក់គ្រឿងញៀនក្នុងកញ្ចប់ស្កគ្រាប់។ កិច្ចប្រតិបត្តិការណ៍នេះ គឺធ្វើឡើង កាលថ្ងៃទី៥ ខែមករា ឆ្នាំ២០២១ នៅសង្កាត់ប្អេរ ក្រុងកំពង់ឆ្នាំង ។
លោក ហ៊ុល វាសនា ស្នងការរងនគរបាលខេត្តកំពង់ឆ្នាំង បានប្រាប់ឲ្យដឹងថា ជសង្ស័យដែលសមត្ថកិច្ចឃាត់ខ្លួននេះ មានឈ្មោះ ប៉ូ.មេសា អាយុ ២៧ឆ្នាំ ជនជាតិខ្មែរ មុខ រស់នៅភូមិធម្មយុត្តិ សង្កាត់ប្អេរ ក្រុងនិងខេត្តកំពង់ឆ្នាំង។ ក្នុងពេលឃាត់ខ្លួនសមត្ថកិច្ចបានធ្វើការដកហូតថ្នាំញៀន ចំនួន១៧កញ្ចប់ ដែលជនសង្ស័យបានច្រកបន្លំដាក់ក្នុងសំបកថង់ស្កគ្រាប់ ។
លោកស្នងការរងបានឲ្យដឹងទៀតថា កិច្ចប្រតិបត្តិការនេះ គឺមានការលំបាកដោយក្រុមជនសង្ស័យ បានប្រើប្រាស់លេខទូរស័ព្ទដែលមានអត្តសញ្ញាប័ណ្ណរបស់អ្នកដទៃ យកទៅធ្វើសកម្មភាពជួញដូរគ្រឿងញៀន ។ ដែលសមត្ថកិច្ចនគរបាលខេត្តកំពង់ឆ្នាំងស្រាវជ្រាវ រហូតដល់ខេត្តតាកែវ ។ ហើយការជួញដូររបស់ជនសង្ស័យ បានផ្លាស់ប្តូរនិង ប្រើវិធីសាស្រ្តប្លែកៗ ដើម្បីគេចពីការបង្រ្កាបរបស់មត្ថកិច្ច ។
លោកស្នងការរងបានស្នើដល់ប្រជាពលរដ្ឋ អាជ្ញាធរមូលដ្ឋាន និង អាណាព្យាបាលចូលរួមសហការជាមួយសមត្ថកិច្ចដើម្បីទប់ស្កាត់ និង បង្រ្ការករណីគ្រឿងញៀននេះឲ្យបានទាន់ពេលវេលា ៕
ចន្ថា