សារព័ត៌មានអ៊ុីរ៉ង់​នៅថ្ងៃទី ៣០ខែមករាបានផ្សាយថា អគ្គរដ្ឋទូតអុីរ៉ង់ប្រចាំនៅក្នុងប្រទេសរុស្ស៊ី លោកKazem Jalali ​បានឲ្យដឹងថា រដ្ឋាភិបាលទីក្រុងតេអេរ៉ង់ និងទីក្រុងមូស្គូ បានព្រមព្រៀងគ្នាស្តីពីការផ្តល់ជូនវ៉ាក់សាំង​កូវីដ​-១៩ Sputnik V របស់រុស្ស៊ី ។
តាមគម្រោងវ៉ាក់សាំង Sputnik V ដំបូងរបស់រុស្ស៊ីនឹងបញ្ជូនទៅដល់ប្រទេសអុីរ៉ង់នៅសប្តាហ៍ក្រោយ​។ ឯកអគ្គរដ្ឋទូតអុីរ៉ង់​បានបញ្ជាក់ថា ​ក្រោយពេលអនុម័តប្រើប្រាស់វ៉ាក់សាំងប្រឆាំងកូវីដ​-១៩ ​នៅថ្ងៃទី ២៩ខែមករា អុីរ៉ង់ និងរុស្ស៊ីក៏បានព្រមព្រៀងគ្នាទិញវ៉ាក់សាំងនិងរួមគ្នាផលិតវ៉ាក់សាំង​​ Sputnik V ។
តាមគម្រោង វ៉ាក់សាំងប្រឆាំងកូវីដ​-១៩​Sputnik V និឹងបញ្ជូនទៅដល់ប្រទេសអុីរ៉ង់ នៅថ្ងៃទី ៤ខែកុម្ភៈ ខាងមុខ ។ ជាមួយគ្នានេះ ក្រសួងសុខាភិបាលអុីរ៉ង់​​នឹងទៅកាន់ប្រទេសរុស្ស៊ី ក្នុងរយៈពេល​១០ថ្ងៃខាងមុខ ដើម្បីពិភាក្សាពីការផលិតវ៉ាក់សាំងនៅក្នុងប្រទេសអុីរ៉ង់​។
កន្លងមកនៅក្នុងប្រទេសឥណ្ឌា​​ រដ្ឋាភិបាលតួកគី ក៏បានចុះកិច្ចព្រមព្រៀង​ជាមួយរុស្ស៊ីក្នុងការផលិតវ៉ាក់សាំង Sputnik V ឲ្យបានច្រើនដើម្បីបំពេញតម្រូវការចាក់ជូនពលរដ្ឋ​បានទាន់ពេលវេលាផងដែរ។
អុីរ៉ង់​ស្ថិតនៅលំដាប់ទី​១៩ ក្នុងតារាងប្រទេសដែលមានករណីឆ្លងកូវីដ​-១៩ ជុំវិញពិភពលោក ។ តាមគេហទំព័រ Worldometer ​គិតមកដល់ម៉ោង១៦ថ្ងៃទី៣០ខែមករា អុីរ៉ង់មានករណីឆ្លងសរុប 1.405.414 នាក់ និងស្លាប់​57.807នាក់៕ ដោយ សាធី

រូបភាព៖ Getty